15 myń qyzylordalyq aýdan ortalyǵyna tóte jolmen qatynamaq
ASTANA. QazAqparat - Bıyl Qyzylorda oblysynyń Qazaly aýdanynda 560 mln teńgege jol jóndeý jumystary júrgizildi, dep habarlaıdy QazAqparat.
Keler jyly jalpy quny 5 mlrd 643 mln teńgege uzyndyǵy 141 shaqyrym bolatyn aýdandyq mańyzdaǵy avtomobıl joldary men eldi meken ishilik kósheler ortasha jáne kúrdeli jóndeýden ótpek. Atap aıtsaq, «Qazaly-Qojabaqy-Bozkól-Káýkeı», «Órkendeý» eldi mekenine kire beris-Jankent, «Qojabaqy-Bekarystan bı», «Basyqara-Abaı-Órkendeý» aýdandyq mańyzdaǵy avtomobıl joldary men Áıteke bı kentiniń 68 shaqyrym bolatyn 55 kóshesin jóndeý jumystary. Bul baǵyttarda oblystyq bıýdjetten 16,8 mln teńge bólinedi dep josparlanyp otyr.
Osy avtomobıl joldary boıyndaǵy kópirlerdi jóndeý jumystary da nazardan tys qalǵan joq. Kópten beri óńirde sheshimin kútip kelgen mańyzdy máselelerdiń biri kópir máselesi oń sheshimin tapty.
Sonymen birge, «Álseıit» ótkelindegi temirbeton kópiriniń qurylysy bastaldy. Kópirdiń jalpy smetalyq quny - 2 mlrd 791,346 mln teńge. Bıyl onyń qurylysyn bastaýǵa respýblıkalyq, oblystyq bıýdjetterden 550 mln teńge bólindi. Darııanyń arǵy betindegi 15 myń halyq keler jyldan bastap tóte jol arqyly aýdan ortalyǵyna qatynaıtyn bolady.
Sondaı-aq, jaqynda ǵana «Bozkól-Tasaryq» aýdandyq mańyzdaǵy avtomobıl jolynyń 22 shaqyrymyndaǵy temir-beton kópiriniń qurylysy aıaqtaldy.
Al «Qojabaqy-Bekarystan bı» aýdandyq mańyzdaǵy avtomobıl jolynyń 25 shaqyrymyndaǵy temirbeton kópirin qaıta jańǵyrtý máselesi de kóp uzamaı sheshiletin bolady.
