15 myń qazaqstandyq Coursera bilim berý platformasynda tegin oqýdy aıaqtady

NUR-SULTAN. QazAqparat - QR Eńbek jáne halyqty áleýmettik qorǵaý mınıstrliginiń, «Eńbek resýrstaryn damytý ortalyǵy» AQ men Coursera onlaın oqytý platformasynyń birlesken jobasy aıasynda 15 myń qazaqstandyq túrli baǵyttar boıynsha tegin kýrstarda oqýdy aıaqtady, dep habarlaıdy QazAqparat atalmysh vedomostvonyń baspasóz qyzmetine silteme jasap.

Álemge áıgili Coursera platformasy qazaqstandyqtardy oqytý úshin 2020 jylǵy 15 qyrkúıekten 2021 jylǵy 14 aqpanǵa deıingi kezeńge kvotalar bóldi. Jobany iske asyrý qorytyndysy boıynsha 15 myńnan astam azamat álemniń jetekshi sarapshylarynyń, oqý uıymdary men ýnıversıtetteriniń, sonyń ishinde GOOGLE, IBM, Facebook, Stanford University, Yale University, Johns Hopkins University, Princeton University jáne t. b. 500-ge jýyq kýrstarynan ótti. Jobaǵa qatysýshylar barlyǵy 335 myń saǵat oqýdan ótti, 3 myńǵa jýyq adam eki jáne odan da kóp kýrstardy aıaqtaǵan.

Qazaqstandyqtar arasynda IT jáne kompıýterlik ǵylymdar, bıznes, tilderdi oqytý, gýmanıtarlyq jáne áleýmettik ǵylymdar, jeke jamý sııaqty baǵyttar suranysqa ıe boldy. TOP-5 kýrsqa «Teach English Now! Technology Enriched Teaching», «Programming for Everybody (Getting Started with Python)», «Business English: Basics», sonymen qatar «Jobalar men ónimdermen jumys jasaýdaǵy Agile men Scrum» jáne «Python-ǵa ený» kiredi.

Onlaın oqytý, ásirese jastar arasynda tanymal boldy: bilim alýshylardyń eń kóp sany «26-dan 30 jasqa deıin» jáne «21-den 25 jasqa deıin» jas sanatyna jatady. Odan keıin «31-35 jas» jáne «20 jasqa deıingi» toptar.

Joba qatysýshylary kommýnıkatsııa, kásipkerlik, kóshbasshylyq jáne menedjment, kompıýterlik baǵdarlamalaý, sondaı-aq bıznes-taldaý daǵdylaryn ıgerdi jáne damytty.