15 mlrd teńgeniń jobasy: Jambylda 4 aýylǵa sý berildi, taǵy 8 nysan aıaqtalýǵa jaqyn
TARAZ. KAZINFORM — Jambyl oblysynyń aýyldaryn sýmen jabdyqtaýǵa qaıtarylǵan aktıvter qarajaty esebinen 15 mlrd teńge bólindi, dep habarlaıdy Úkimettiń baspasóz qyzmeti.
Memleket basshysynyń tapsyrmalaryn oryndaý sheńberinde Jambyl oblysynda sýmen jabdyqtaýdyń 12 jobasyn júzege asyrý Arnaýly memlekettik qor qarajaty esebinen qarjylandyrylady.
— Úkimet bul maqsattarǵa 15,4 mlrd teńge bóldi. Búgingi tańda 4 nysan paıdalanýǵa berildi, qalǵan 8 nysandaǵy qurylys jumystaryn osy jyldyń sońyna deıin aıaqtaý josparlanyp otyr. Máselen, qazirdiń ózinde tórt eldi mekenniń turǵyndary sapaly aýyz sýmen qamtamasyz etilgen. Atap aıtqanda, Jambyl aýdanynda Qyzylsharyq, Jańaótkel jáne Juma aýyldarynda jumystar aıaqtaldy. 300-den astam adam turatyn Talas aýdany Qaraoı aýylynda sý qubyry iske qosyldy. Buryn ol jerde ortalyqtandyrylǵan sýmen jabdyqtaý bolmaǵan. Jobanyń jalpy quny 933,4 mln teńgeni qurady, onyń 106,7 mln teńgesi tikeleı Arnaýly memlekettik qordan bólindi. Osy jyldyń sońyna deıin tapsyrý josparlanǵan 8 nysanda jumys jalǵasady. Bul oblystyń shalǵaı aýdandaryndaǵy jobalar. Máselen, Moıynqum aýdanynda Shyǵanaq, Myńaral jáne Qumózek stansalarynda, sondaı-aq Moıynqum, Bınazar jáne Birlik aýyldarynda jeliler rekonstrýktsııalanyp jatyr, — delingen habarlamada.
Sarysý aýdanynda sý qubyryn rekonstrýktsııalaý Jaıylma jáne Maıatas aýyldaryn qamtıdy, al Qordaı aýdanynda Qarasaı batyr aýylynda jeliler qurylysy júrip jatyr. Óńirde sýmen qamtamasyz etý máselelerin sheshý júıeli negizde júrgiziledi.
Prezıdent tapsyrmasyna sáıkes oblysta halyqty 100% aýyz sýmen qamtý mindeti júzege asyrylyp jatyr. 2025 jyldyń 10 aıynyń qorytyndysy boıynsha óńir qalalarynda qamtamasyz etý — 98%-dy, aýyldyq eldi mekenderde — 99,3%-dy quraıdy. Jambyl oblysynda barlyǵy 23 sýmen jabdyqtaý jobasy júzege asyrylyp jatyr, onyń 13-i paıdalanýǵa berildi.
Aıta keteıik, osyǵan uqsas jumys barlyq Qazaqstan boıynsha júrgiziledi. Elimizdiń eldi mekenderin tolyq qamtý úshin bıyl respýblıkalyq bıýdjetten 257 jobany júzege asyrýǵa 105,7 mlrd teńge bólindi. Sýmen jabdyqtaý salasyndaǵy taǵy 229 jobany júzege asyrýǵa Arnaýly memlekettik qor qarajaty esebinen qosymsha 135,8 mlrd teńge bólindi.
Budan buryn Jambyl oblysynyń Merki aýdanynda 2 ırrıgatsııalyq kanaldyń rekonstrýktsııasy aıaqtalǵanyn jazǵan edik.