15 mlrd dollar krıptovalıýta: Qarjylyq monıtorıng agenttigi Ulttyq bank deregine kúmán keltirdi

ASTANA. KAZINFORM — Qarjylyq monıtorıng agenttigi tóraǵasynyń orynbasary Jeńis Elemesov qazaqstandyqtardyń 15 mlrd dollardyń krıptoaktıvin kóleńkeli aımaqtan satyp alǵany týraly málimetke pikir bildirdi.

— Jýyqta Ulttyq bank tóraǵasynyń orynbasary Berik Sholpanqulov qazaqstandyqtar 15 mlrd teńgege krıptoaktıv satyp alǵanyn málim etti. Siz usynyp otyrǵan zań jobasy osyndaı operatsııalar arqyly aktıvterdi jylystatý áreketterin toqtata ala ma? Krıptoaktıv arqyly syrtqa aqsha jylystatqan tulǵalardy anyqtaý baǵytynda jumys júrgizip jatyrsyzdar ma, — dep surady depýtat Marat Báshimov.

Agenttik basshysynyń orynbasary Ulttyq bank deregin resmı málimet retinde qarastyrýǵa áli erte degen pikir aıtty.

— Shyn máninde 15 mlrd dollardy krıptoaktıv retinde shyǵardy dep aıtýǵa áli erte shyǵar. Óıtkeni bul málimetter blokcheınge saraptama jasaıtyn kompanııalardan alynǵan. Biz osy esepterdiń ádistemesin surattyq. Shynyn aıtsam, ol esepterden kóp suraq týyndaıdy. Sondyqtan mundaı tsıfrlar týraly aıtýǵa áli erte dep oılaımyn, — dedi ol.
Agenttik ókili qazir Qazaqstan aýmaǵynda tsıfrlyq aktıvter aınalymyna tyıym salynǵanyn eske saldy.

— Alaıda Memleket basshysynyń tapsyrmasy boıynsha tsıfrlyq aktıvter aınalymyn kóleńkeden shyǵarýǵa arnalǵan zań jobasy ázirlenip jatqanyn bilesizder. Qazir Qazaqstan aýmaǵynda ótip jatqan operatsııalardyń bári kóleńkeli aımaqta. Osyndaı kóleńkeli aıyrbastaý beketteriniń ústinen qozǵalǵan birqatar qylmystyq is bar. Zań jobasynda tsıfrlyq aktıvterdiń aınalymyna 5 mln teńge shekti meje qoıyp otyrǵanymyz da sodan, — dedi Jeńis Elemesov.

Eske salsaq, Ulttyq bank tóraǵasynyń orynbasary Berik Sholpanqulov qazaqstandyqtar kóleńkeli aımaqtan 15 mlrd dollarǵa krıptovalıýta satyp alǵanyn málim etken bolatyn.