1,5 mln-nan astam ótinish qabyldandy: iKOMEK109 bıylǵy jumysyn qorytyndylady
ASTANA. KAZINFORM – Osy jyldyń basynan beri iKOMEK109 Astana qalalyq monıtorıng jáne jedel áreket etý ortalyǵy alǵashqy qońyraýdan-aq 1 557 708 konsýltatıvtik ótinishti qabyldap, oryndady, dep habarlaıdy Astana qalasy ákimdiginiń resmı saıty.
10 aı boıynsha atqarylǵan jumys qorytyndysyn ortalyq basshysynyń orynbasary Asylbek Temeshbekov Kommýnıkatsııalar qyzmetinde ótken brıfıngte baıandady.
Búginde iKOMEK109 qalanyń 23 basqarmasyn, 6 aýdandyq ákimdikti, 25 kommýnaldyq qyzmetti, 79 lıft sharýashylyǵyn jáne 1 372 kóppáterli turǵyn úıge qyzmet kórsetetin uıymdy biriktirip otyr. Ortalyqtyń negizgi mindeti – elordanyń tirshiligin qamtamasyz etý máseleleri boıynsha turǵyndardyń ótinishterin jedel qabyldaý, óńdeý jáne oryndalýyn baqylaý.
iKOMEK109 qurylǵan kúnnen bastap 16 mıllıon 229 myń ótinish óńdelgen. Al 10 aıdyń qorytyndysy boıynsha 1 557 708 ótinish alǵashqy qońyraý barysynda-aq sheshilgen. Eń kóp ótinish túsken baǵyttar:
• Densaýlyq saqtaý – 565 604 ótinish;
• Qoǵamdyq kólik – 228 811 ótinish;
• Qalany elektrmen jabdyqtaý – 120 605 ótinish;
• Qalalyq orta – 113 743 ótinish;
• Biryńǵaı tólem qujaty – 109 091 ótinish;
• Bilim berý – 78 761 ótinish;
• Jol ınfraqurylymy – 64 022 ótinish;
• Qoǵamdyq tártip – 38 883 ótinish;
• Turǵyn úılerdi sýmen jabdyqtaý – 33 757 ótinish;
• Qalalyq sýmen jabdyqtaý – 32 186 ótinish.
«10 aıda 308 428 jaǵdaı tirkeldi. Bul kórsetkish ótken jyldyń osyndaı kezeńimen salystyrǵanda 19%-ǵa tómen. Ol – bul jaýapty qyzmetterdiń nazaryn jáne aralasýyn talap etetin oqıǵa týraly turǵynnyń ótinishi. Olardyń azaıýy qala turǵyndarynyń iKOMEK arqyly kótergen máseleleri jedel sheshilip jatqanyn bildiredi», — dedi spıker.
Ortalyqtyń negizgi maqsaty – turǵyndardyń ótinishterin qashyqtan jyldam ári tıimdi sheshý. Osy maqsatta omnıkanaldy qyzmet engizilgen, bul turǵyndarǵa ótinishti ártúrli tásilmen joldap, onyń mártebesin baqylaýǵa múmkindik beredi. Qazirgi tańda ótinishterdiń 22%-y balama tsıfrlyq servıster arqyly túsedi.
1-0-9 qysqa nómirinen bólek, ótinishti kelesi arnalar arqyly berýge bolady:
1. Telegram-bot
2. astana.gov.kz saıty
3. iKOMEK109 mobıldi qosymshasy
4. Facebook áleýmettik jelisi
5. Instagram áleýmettik jelisi
6. Elektrondyq poshta: 109@ikomekastana.kz
iKOMEK109 mobıldi qosymshasynyń paıdalanýshylary – 99 myń adam.
«Turǵyndardan Telegram-bot pen mobıldi qosymshany jıirek paıdalanýdy suraımyz. Bul qyzmet máseleni tolyq sıpattap, foto jáne vıdeo tirkeýge múmkindik beredi. Bul óz kezeginde call-ortalyq operatorlarynyń júktemesin azaıtady», — dedi Asylbek Temeshbekov.
iKOMEK qala aýmaǵyndaǵy 12 myńnan astam beınebaqylaý kamerasyna qosylǵan. Kameralar balabaqshalarda, mektepterde, emhanalarda jáne ózge de nysandarda ornalasqan. Negizinen jol ýchaskeleri, qıylystar, adamdar kóp shoǵyrlanatyn oryndar – saýda ortalyqtary, meshitter, iri avtobýs pavılondary, vokzaldar qamtylady.
Sonymen qatar operatorlar qalalyq beınebaqylaý júıesi arqyly maýsymdyq máselelerdi anyqtaıdy: ýaqytyly jınalmaǵan qar, sý tasqyny nemese jańbyr kezindegi sý jınalý jaǵdaılary, ashyq qudyqtar jáne turǵyn úı-kommýnaldyq sharýashylyqqa qatysty ózge de jaǵdaılar.
Barlyq anyqtalǵan jaǵdaılar kommýnaldyq qyzmettermen jedel túrde úılestiriledi. Qala qaýipsizdigin tıimdi baqylaý úshin ortalyqta Astana polıtsııa departamentiniń qyzmetkerleri de jumys isteıdi. 2025 jyldyń basynan beri barlyǵy 20 458 quqyqbuzýshylyq anyqtaldy:
• 615-bap boıynsha – 3 506 quqyqbuzýshylyq;
• 440-bap boıynsha – 291;
• 505-bap boıynsha – 409;
• 204-bap boıynsha – 24.
«Qaladaǵy ózekti máselelerdiń biri – stıhııalyq qoqys úıindileri. Bul baǵytta Ahýaldyq ortalyq tıimdi jumys júrgizip keledi. 2025 jyldyń basynan beri 656 aýyr júk kóliginiń ıesi belgilenbegen jerge qoqys tókkeni anyqtaldy», — dep tolyqtyrdy spıker.
Aıta keteıik, Astana ákimdigi feldsher Uldana Myrzýannyń otbasyna járdemdesedi.