1,5 mln-nan asa qazaqstandyq belsendi túrde kıbersportpen aınalysady
ASTANA. KAZINFORM — Oljas Bektenov Phygital International basshysy Rene Fazelmen kezdesti, dep habarlaıdy Úkimettiń baspasóz qyzmeti.
Qazaqstan Respýblıkasynyń Premer-mınıstri Oljas Bektenov Phygital International kompanııasynyń negizin qalaýshy, doktor Rene Fazelmen jáne uıymnyń bas dırektory Nıs Hattpen kezdesý ótkizdi. Onda fıdjıtal-sportty fızıkalyq belsendilik pen tsıfrlyq tehnologııalardy biriktiretin perspektıvalyq baǵyt retinde damytýǵa nazar aýdaryldy.
— 2026 jyly Qazaqstanda «Bolashaq oıyndary» halyqaralyq týrnırin ótkizý jónindegi máseleler talqylandy. Týrızm jáne sport mınıstri Erbol Myrzabosynov daıyndyq bekitilgen josparǵa sáıkes júrgizilip jatqanyn baıandady. QR Kıbersport federatsııasynyń derekterine sáıkes, búginde 1,5 mln-nan astam qazaqstandyq belsendi túrde kıbersportpen aınalysady. Joǵary tehnologııalyq halyqaralyq is-sharany Astanada uıymdastyrý jastar arasynda jańa sporttyq formattardyń tanymaldylyǵyn arttyrýǵa yqpal etpek, — delingen habarlamada.
Kezdesýge qatysýshylar fıdjıtal-sportty damytý boıynsha yntymaqtastyqty nyǵaıtý jónindegi nıetterin jetkizdi.
Aıta keteıik, Phygital International álemniń 98 elin qamtıtyn Phygital Dúnıejúzilik qaýymdastyǵymen (WPC) seriktestikte jumys isteıdi. WPC fıdjıtal-pánder úshin erejeler men standarttardy ázirleýmen, «Bolashaq oıyndary» (games of the Future) halyqaralyq týrnırine qatysý úshin óńirlik jáne ulttyq irikteý týrnırlerin uıymdastyrýmen aınalysady. Sport, tsıfrlyq tehnologııalar jáne marketıng sııaqty ártúrli salalardaǵy mamandardyń basyn biriktiredi.
Budan buryn múlikti memleketke syıǵa tartý sharttary ózgerýi múmkin ekeni habarlandy.