15 myń krýız jolaýshysy Parsy shyǵanaǵynda turyp qaldy
ASTANA. KAZINFORM — Dýbaı, Doha jáne Abý-Dabı porttarynda turyp qalǵan kemelerdiń jolaýshylaryn úılerine qaıtarý úshin krýızdik kompanııalar táýlik boıy jumys istep jatyr, dep habarlaıdy Euronews.
Aımaqtaǵy shıelenistiń kúsheıýine baılanysty birneshe keme Parsy shyǵanaǵyndaǵy porttardan shyǵa almaı qalǵandyqtan, Eýropaǵa josparlanǵan birqatar krýız toqtatyldy.
Taıaý Shyǵystaǵy jalǵasyp jatqan qaqtyǵys operatorlardy reısterdi ýaqytsha toqtatýǵa jáne porttarda qalyp qoıǵan myńdaǵan jolaýshyny elderine qaıtarýǵa májbúr etti.
BUU-nyń Halyqaralyq teńiz uıymy (IMO) AFP agenttigine bergen málimet boıynsha, aımaqta birneshe operatordyń kemelerinde júrgen 15 myńǵa jýyq krýız jolaýshysy porttarda qalyp qoıǵan. Olardyń qatarynda MSC, TUI, Celestyal jáne AROYA kompanııalarynyń kemeleri bar.
Dúısenbi kúni Celestyal grek krýızdik kompanııasy óz kemeleriniń áli de shyǵanaqta turǵanyn rastady: Celestyal Discovery qazir Dýbaıda, al Celestyal Journey Dohada tur.
Kompanııanyń málimetinshe, Dýbaıdaǵy jolaýshylardyń barlyǵy qaýipsiz túrde jaǵaǵa túsirilgen, al Celestyal Journey kemesindegi qalǵan jolaýshylar Qatarda aldaǵy 24 saǵat ishinde túsiriledi dep kútilip otyr.
— Eki keme de tolyqtaı jaramdy jáne teńizge shyǵýǵa daıyn», — delingen Celestyal málimdemesinde.
Sondaı-aq, kemelerdiń aımaqtan shyǵýy tıisti organdardyń usynymdaryna sáıkes júzege asatyny aıtyldy.
Alaıda bul jaǵdaı Celestyal kompanııasyn grek araldaryna josparlanǵan eki krýızdi toqtatýǵa májbúr etti. Olar «Iconic Aegean» baǵdarlamasy aıasynda osy aıdyń sońynda ótýi tıis edi.
20 naýryzǵa josparlanǵan úsh kúndik, al 23 naýryzǵa belgilengen tórt kúndik krýız Celestyal Discovery kemesimen ótpeıtin boldy. Qazir kompanııa laınerdi jazǵy maýsymǵa daıyndap, ony Jerorta teńizine kóshirýge daıyndalyp jatyr.
Toqtatylǵan reısterge bılet alǵan jolaýshylarǵa aqshasyn tolyq qaıtaryp alý nemese bolashaq krýızderge arnalǵan vaýcher alý usynylady.
Maýsym toqtatyldy, jolaýshylar elderine qaıtarylyp jatyr
Aımaqta jumys isteıtin basqa da krýızdik operatorlar óz baǵdarlamalaryn ózgertýge nemese ýaqytsha toqtatýǵa májbúr boldy.
Saýd Arabııasynyń qoldaýymen jumys isteıtin AROYA Cruises kompanııasy Parsy shyǵanaǵyndaǵy qysqy maýsymynyń qalǵan bóligin tolyq toqtatqanyn málimdedi.
Kompanııanyń habarlaýynsha, 7 naýryz kúni olardyń laınerindegi barlyq jolaýshy Dýbaıda qaýipsiz túrde jaǵaǵa túsirilgen. Bul sheshim aımaqtaǵy kúrdeli jaǵdaıdy eskere otyryp jáne teńiz jáne ulttyq bılik organdarymen kelisim negizinde qabyldanǵan.
Al Jenevada ornalasqan MSC Cruises kompanııasy Dýbaıdaǵy MSC Euribia laınerinde bolǵan jolaýshylardy elderine qaıtarý úshin arnaıy reıster uıymdastyryp jatyr. Krýızdik kompanııanyń málimetinshe, 1500-den astam jolaýshynyń aımaqtan ushyp ketýine jaǵdaı jasalǵan.
Qazirdiń ózinde jeti reıs oryndalǵan. Onyń ishinde arnaıy charterlik ushýlar da, sondaı-aq kommertsııalyq áýe kompanııalarynan satyp alynǵan oryndar da bar. Jolaýshylar Ulybrıtanııaǵa, Italııaǵa, Germanııaǵa, Ispanııaǵa, AQSh pen Brazılııaǵa jetkizildi.
— Keme komandıri men ekıpaj jolaýshylardyń barlyq qajettiligimen qamtamasyz etilýi úshin tynymsyz eńbek etti. Álemniń ár túkpirindegi komandalar olardy qaýipsiz ári múmkindiginshe tez úılerine jetkizý úshin táýlik boıy jumys istedi, — dedi MSC Cruises atqarýshy tóraǵasy Perfranchesko Vago.
Al nemistiń TUI Cruises operatory Mein Schiff 4 laıneriniń barlyq reısin 23 naýryzǵa deıin, al Mein Schiff 5 laıneriniń reısterin 12 naýryzǵa deıin toqtatqanyn habarlady.
Qazirgi ýaqytta Mein Schiff 4 kemesi Abý-Dabı portynda tur.
— Sońǵy kúnderi barlyq jolaýshy men ekıpaj músheleriniń kóp bóligi úshin keri reıster uıymdastyryldy, — dep málimdedi kompanııa.
Al Mein Schiff 5 laınerindegi jolaýshylar ázirge Dohadaǵy kemede qalyp otyr, biraq jaǵdaıdy eskere otyryp, keme jumysy «qalypty rejımde» jalǵasyp jatyr.
Jolaýshylar men ekıpajdy elderine qaıtarý jumystary TUI Cruises uıymdastyrǵan charterlik reıster jáne Qatar Airways áýekompanııasynyń turaqty reısterindegi brondar arqyly úzdiksiz júrgizilip jatyr.
Budan buryn Qazaqstan Izraılden óz azamattaryn evakýatsııalaýǵa járdem suraǵanyn jazǵan edik.
