15 myń qyz adam papıllomavırýsyna qarsy ekpeniń ekinshi dozasyn aldy

ASTANA. KAZINFORM – Qazaqstanda adam papıllomavırýsyna (APV) qarsy ımmýndaý baǵdarlamasyn iske asyrý jalǵasyp jatyr. Búgingi tańda vaktsınatsııalaýdyń birinshi kezeńi sheńberinde 11-13 jas aralyǵyndaǵy 132 myńnan astam qyz ótti, 15 myńnan astamy vaktsınanyń ekinshi dozasyn aldy.

— Naýqan bastalǵannan beri 147 myńnan astam qyz vaktsınatsııalaýdyń tolyq kýrsyn aıaqtady. Barlyq ekpe alǵan jaǵdaıdyń arasynda jaǵymsyz keri reaktsııalar tirkelgen joq. Vaktsına qaýipsiz, jaqsy tózimdi jáne Dúnıejúzilik densaýlyq saqtaý uıymy profılaktıkanyń tıimdi ádisi retinde usynady, — delingen Densaýlyq saqtaý mınıstrliginiń habarlamasynda.

APV-nyń joǵary qaýipti onkogendik túrleri, atap aıtqanda 16 jáne 18 — jatyr moıny obyrynyń damýynyń negizgi sebebi. Vaktsınatsııalaý turaqty ımmýnıtetti qalyptastyrýǵa jáne bolashaqta aýrýdyń damýyn boldyrmaýǵa múmkindik beredi.

Jyl saıyn álemde jatyr moıny obyrynan 300 myńǵa jýyq áıel qaıtys bolady. Qazaqstanda jyl saıyn JMO-nyń 2 myńǵa jýyq jańa jaǵdaıy tirkeledi.

Ulttyq APV-ǵa qarsy vaktsınatsııalaý baǵdarlamasy josparly túrde júzege asyrylady jáne 11-13 jas aralyǵyndaǵy barlyq qyzdy qamtıdy. Qazaqstan onkologııalyq aýrýlardy azaıtý jáne áıelder densaýlyǵyn saqtaý maqsatynda osy tájirıbeni engizgen 135 eldiń biri boldy. 

Aıta ketelik elde kimderge plastıkalyq ota tegin jasalatyny týraly jazǵan edik.