15 mıllıon teńgeniń jalǵan «Apple» ónimderi tárkilendi
Elimizde 15 mln teńgeniń jalǵan «Apple» ónimderi tárkilendi. Bul týraly Ádilet mınıstrliginiń resmı ókili Talǵat Ýálı aıtty, dep habarlaıdy Kazinform.
«Aýmaqtyq ádilet organdary zııatkerlik menshik salasyndaǵy quqyq buzýshylyqtardyń jolyn kesý jumysyn jalǵastyryp jatyr. Tekserýler quqyq ıelenýshilerdiń ótinishteri negizinde júrgiziledi. Azamattyq aınalymnan alynatyn kontrafaktilik ónimderdiń tizimi óte keń. Bul - kıim, turmystyq hımııa, avtomobılderge arnalǵan qosalqy bólshekter, gadjetterdiń barlyq túrleri. Tipti tamaq ónimderi de tárkilenedi. «Chanell», «Apple», «ZEPTER», «Levi`s», «Louis Vuitton», «LEGO», «PUMA», «TOYOTA/LEXUS», «Naýryz», «Assam», «Prachka» sııaqty taýar belgileri ıeleriniń quqyqtary qorǵalǵan», - dedi mınıstrlik ókili aptalyq brıfıng barysynda.
Onyń atap ótýinshe, tek «Apple» kompanııasynyń ótinishi boıynsha 30 tekserý is-sharasy ótkizilgen.
«Tekserý qorytyndysy boıynsha barlyq tulǵa ákimshilik jaýapkershilikke tartyldy. 15 mıllıon teńgeden astam somaǵa 9 662 birlik qulaqqaptar, smart-saǵattar, qýattaý qurylǵylary, symdar, uıaly telefondarǵa arnalǵan aksessýarlar syndy jalǵan ónimder tárkilendi», - dedi ol.
Talǵat Ýálıdiń dereginshe, Almaty qalalyq ádilet departamenti shamamen 1,6 mln teńge somasyna 4 076 birlik mólsherinde «APPLE», «iPhone» taýar belgisiniń zańsyz beınesi bar kontrafaktilik ónimdi tárkiledi. Tárkilengen ónimder Almaty qalasynyń ákimshilik quqyq buzýshylyq jónindegi mamandandyrylǵan aýdanaralyq sotynyń qaýlysyna sáıkes joıyldy. Kináli tulǵaǵa aıyppul salyndy.
«Ákimshilik quqyq buzýshylyq týraly» kodekstiń «bóten taýar belgisin, qyzmet kórsetý belgisin, taýar shyǵarylǵan jerdiń ataýyn nemese fırmalyq ataýdy zańsyz paıdalaný» 158-baby boıynsha ákimshilik jaýapkershilikke 74 adam tartylyp, aıyppuldardyń jalpy somasy shamamen 6 mln teńgeni qurady. Jyldyń basynan beri ádilet organdary bóten taýar tańbasyn zańsyz paıdalanýdyń 92 faktisin anyqtap, azamattyq aınalymnan 45 mıllıon teńgeden astam somaǵa 24 myńǵa jýyq kontrafaktilik ónim tárkilendi», - dedi resmı ókil.
