15 mıllıard teńgeni ıemdengen «QI-Trade Kazakhstan» qarjy pıramıdasynyń jetekshisi ekstradıtsııalandy

ASTANA. KAZINFORM – Qazaqstan Bas prokýratýrasy Qyrǵyz Respýblıkasynan transulttyq uıymdasqan qylmystyq toptyń quramynda qarjy pıramıdasyn qurǵany jáne basqarǵany úshin qylmystyq jaýaptylyqqa tartý maqsatynda Qazaqstan azamatyn ekstradıtsııalady.

Bas prokýratýranyń málimetinshe, atalǵan toptyń músheleri 2017-2020 jyldar aralyǵynda Qazaqstan aýmaǵynda «QI-Trade» qarjy pıramıdasyn uıymdastyryp, 4,7 myńnan astam salymshynyń jalpy somasy 15 mıllıard teńge qarajatyn zańsyz ıemdengen.

Qylmystyq toptyń keıbir músheleri sotpen ártúrli jazaǵa tartylǵan, al kúdikti qylmys jasaǵannan keıin boı tasalap, halyqaralyq izdeýge jarııalandy. Іzdeýde bola tura, ol Qyrǵyzstanda kisi óltirý qylmysyn jasap, qyrǵyz sotymen sottaldy.

Qazaqstan Respýblıkasy Bas prokýratýrasynyń suraýy boıynsha ol ýaqytsha ustap berildi, al qarjy pıramıdasyn qurǵany jáne basqarǵany úshin qylmystyq jaýaptylyqqa tartylǵannan keıin Qyrǵyz Respýblıkasyna qaıtarylatyn bolady.

Osylaısha, kórshi memleket aýmaǵynda jazasyn ótegennen keıin kúdiktini Qazaqstan aýmaǵynda jasaǵan qylmysy úshin jaza kútetin bolady. Aıyptalǵan qylmystardy jasaǵany úshin múlki tárkilenip, 12 jylǵa deıingi merzimge bas bostandyǵynan aıyrý túrindegi jaza qarastyrylǵan.

Eske sala keteıik, buǵan deıin Bas prokýratýra osy qylmystyq toptyń eki múshesin Reseı men Polshadan ekstradıtsııalap, olar qazir ártúrli jyldarǵa bas bostandyǵynan aıyrýǵa sottalǵan.

Buǵan deıin Bas prokýratýra qarjy pıramıdasyn qurǵandar eldi qalaı arbaıtynyn aıtty.