15 mamyr kúni álem boıynsha kıbershabýyldar qaıtalanatyny eskertilýde

Financial Times basylymynyń jazýynsha, juma kúni atalmysh vırýs arqyly jahandyq kıbershabýyl jasaldy, dep habarlaıdy QazAqparat.

Eýropol dırektory Rob Ýeınraıt buǵan deıin málim etkendeı, kıbershabýyldardyń serııasy dúısenbi kúni tańerteń qaıta jalǵasýy múmkin. Onyń aıtýynsha, vırýs álemniń 150 elindegi 200 myń kompıýterdi zaqymdap úlgerdi.

Brıtanııalyq barlaý qyzmetiniń ókilderi dúnıejúzi boıynsha kommertsııalyq mekemelerge aýqymdy kıbershabýylǵa ázir bolýǵa keńes berdi, dep jazady basylym.

Avast antıvırýsyn jasap shyǵarýshylar WanaCrypt0r 2.0 vırýsyn qoldanýmen jasalǵan 57 myń hakerlik shabýyl týraly habarlap otyr. Vırýs birinshi kezekte Reseı, Ýkraına jáne Taıvanda taralýda. Al «Kasperskıı zerthanasynyń» málimetinshe, juma kúni álemniń 74 elinde hakerlik shabýyldardyń 45 myń áreketi jasaldy. Kompıýterlerdi zaqymdaý eń kóp áreketteri Reseıde baıqaldy.

Aıta keteıik, juma, 12 mamyr kúniAtyraý oblysynda Kaspıı teńizindegi Qashaǵan ken ornyn ıgerýmen aınalysatyn NCOC kompanııasynyń aqparattyq qaýipsizdik júıesi saǵat shamamen 18.00-de kompanııanyń serverlerine vırýstyq shabýyldy  tirkedi. Aldyn alý sharasy retinde ınternet pen korporatıvti poshtaǵa qoljetimdik ýaqytsha toqtatyldy. Keıin kompanııadan málim etkendeı, kıbershabýyl Qashaǵan nysandarynyń jumysyna kedergi keltirgen joq , óndiris shtattyq rejimde jalǵasýda. 

«QazAqparat» tilshisiniń hakerlerdiń áreketinen kelgen zardaptyń kólemi jónindegi suraǵyna NCOC-tyń baspasóz qyzmeti: «Vırýs keńsedegi serverimiz ben osyndaǵy kompıýterlerimizdiń 10-20 paıyz kólemine tarady. Serverlerdiń rezervti kóshirmeleri bar, degenmen, jekelegen kompıýterlerdegi málimetterdiń joıylyp ketý qaýpi bar. Kelgen zardap aıtarlyqtaı nemese qaýipti emes, biraq bizge júıelerimizdi jiti tazalap, tekserip shyǵý qajet. Buǵan ýaqyt kerek bolady. Qalpyna keltirý protsess ústinde. Konsortsıým boıynsha seriktesterimizden qosymsha kómekter alyp jatyrmyz. Qalpyna keltirý jumystary naqty qashan aıaqtalatynyn aıta almaımyz. NCOC keńseleri 15 mamyr kúni jumys isteıtin bolady. Biraq júıelerimiz tolyǵymen qalpyna kelgenshe jekelegen shekteýler engiziledi», - dep jaýap bergen bolatyn.