15 mamyrda Astananyń ústinen joıǵysh ushaq ushyp ótedi — mınıstrlik sebebin túsindirdi
ASTANA. KAZINFORM — Astanada 15 mamyr kúni QR Qarýly Kúshteri Áýe qorǵanysy kúshteriniń josparly is-sharalary aıasynda qala ústinde joıǵysh ushaqtardyń demonstratsııalyq ushýy ótedi, dep habarlaıdy Qorǵanys mınıstrliginiń baspasóz qyzmeti.
Vedomstvo málimetinshe, is-sharaǵa daıyndyqqa baılanysty 10 mamyrdan bastap elorda áýe keńistiginde áskerı avıatsııanyń jattyǵý ushýlary bastalady.
— Joıǵysh ushaqtardyń ushýy men jattyǵý is-sharalary qaýipsiz bıiktikte júzege asyrylady jáne qala turǵyndarynyń kúndelikti tynys-tirshiligine kedergi keltirmeıdi. Elorda turǵyndary men qonaqtarynan jattyǵýlar men demonstratsııalyq ushý kezeńinde týyndaýy múmkin qysqa merzimdi shý deńgeıiniń artýyna túsinistikpen qaraýdy suraımyz, — delingen habarlamada.
Sonymen qatar, Qorǵanys mınıstrligi barlyq ushýlar qaýipsizdik talaptaryna qatań sáıkes uıymdastyrylady jáne halyqqa eshqandaı qaýip tóndirmeıtinin alǵa tartty.
— Túrli tústi tútinderdi paıdalaný tek demonstratsııalyq sıpatqa ıe jáne qorshaǵan ortaǵa zııandy áser etpeıdi, — dep sendirdi mınıstrlik.
Buǵan deıin Qorǵanys mınıstrligi áskerı qyzmetshilerdiń tólem tártibin jańartqanyn jazǵanbyz.
