15 qyrkúıekte tumaýǵa qarsy vaktsına egý bastalady: Kimder birinshi ekpe alady?
ASTANA. KAZINFORM – Qoǵamdyq densaýlyq saqtaý ulttyq ortalyǵy Infektsııalyq aýrýlardyń aldyn alý departamentiniń dırektory Meıirim Sultanova tumaýǵa qarsy vaktsına birinshi kezekte kimderge salynatynyn aıtty.
— Arnaıy buıryqqa sáıkes vaktsına egý birinshi kezekte medıtsına qyzmetkerlerine jáne sozylmaly aýrýlary bar balalarǵa júrgiziledi. Odan basqa epıdemııalyq kórsetkishter boıynsha da ár adam emhanalarda ekpe ala alady, - dedi ol «Jibek joly» telearnasyndaǵy «Búgin LIVE» baǵdarlamasynda.
Sondaı-aq spıker elimizde qandaı vaktsına salynatynyn jáne onyń qansha danasy alynǵanyn atap ótti.
— Vaktsına egý jumystary búkil respýblıka boıynsha 15 qyrkúıekte bastalady. Oǵan deıin jergilikti medıtsınalyq uıymdarǵa jetkiziledi. Qazirgi tańda 2 mln-nan astam doza satyp alyndy. Buǵan deıin birneshe jyl boıy salynyp kelgen «Grıppol plıýs» vaktsınasy qoldanylady, - dedi Meıirim Sultanova .
Onyń aıtýynsha, ekpe salynǵan soń adamdarda asqyný bolǵan-bolmaǵanyna monıtorıng júrgizilip otyrady.
Eske sala ketsek, Qazaqstannyń bas memlekettik sanıtar dárigeri Sarhat Beısenova tumaý, JRVI jáne COVID-19 ınfektsııasy boıynsha 2025-2026 jyldardyń epıdemııalyq maýsymynda sanıtarlyq-profılaktıkalyq is-sharalar júrgizý týraly qaýlyǵa qol qoıdy.
Buǵan deıin bıyldan bastap elimizde balalar men jasóspirimderge jańa ekpeler egiletinin jazǵan edik.