15 qyrkúıekke deıin deklaratsııa tapsyrý: kimder esep beredi jáne qandaı aıyppul qarastyrylǵan
ASTANA. KAZINFORM – Qazaqstanda jeke tulǵalardyń salyq deklaratsııasyn tapsyrý merziminiń aıaqtalýyna 10 kún qaldy. Kimder deklaratsııa tapsyrýy kerek, qandaı málimetterdi kórsetý qajet jáne talaptardy buzǵan jaǵdaıda qandaı jaýapkershilik qarastyrylǵan – Kazinform tilshisi anyqtap kórdi.
15 qyrkúıekke deıin azamattardyń jekelegen sanattary aktıvteri men mindettemeleri týraly 250.00 nysanyndaǵy, sondaı-aq kirister men múlik týraly 270.00 nysanyndaǵy deklaratsııany tapsyrýy kerek.
Bul rette qazaqstandyqtardyń basym bóligi deklaratsııa tapsyrýdan bosatylǵan. Atap aıtqanda, deklaratsııalaýǵa jatatyn aktıvteri men mindettemeleri bolmasa, jeke kompanııalardyń qyzmetkerleri, zeınetkerler, stýdentter jáne úı sharýasyndaǵy azamattar deklaratsııa tapsyrmaıdy.
Eki deklaratsııany da qaǵaz túrinde memlekettik kirister organdaryna nemese e-Salyq Azamat mobıldi qosymshasy men ekinshi deńgeıli bankterdiń qosymshalary arqyly tapsyrýǵa bolady.
Agenttik saýalyna jaýap bergen Memlekettik kirister komıteti deklaratsııa tapsyrýǵa qatysty jıi qoıylatyn suraqtarǵa jaýap berip, azamattar jiberetin negizgi qatelerdi atady.
250.00 nysanyn kimder tapsyrýy kerek
250.00 nysany «kiris deklaratsııasy» dep atalady. Ol aktıvter men mindettemelerdi deklaratsııalaý mindeti týyndaǵan kezde tapsyrylady.
2026 jyly bul deklaratsııany:
• saılanbaly jáne memlekettik laýazymdarǵa kandıdattar jáne olardyń jubaılary;
• bankterdiń, saqtandyrý uıymdarynyń iri qatysýshysy nemese ınvestıtsııalyq portfeldi basqarýshy bolǵysy keletin tulǵalar;
• shetelde belgili bir aktıvteri bar kámeletke tolǵan Qazaqstan Respýblıkasynyń rezıdentteri tapsyrýy kerek.
• Deklaratsııalaýǵa jatatyn sheteldegi aktıvterge mynalar kiredi:
• shet memlekette tirkelýge tıis jyljymaıtyn múlik jáne ózge de múlik;
• sheteldik bankterdegi shottardaǵy qarajat, eger olardyń jalpy somasy 1000 AEK-ten assa;
• ınvestıtsııalyq altyn;
• sheteldik kompanııalardaǵy jáne turǵyn úı qurylysyna qatysý úlesteri;
• sheteldik emıtentterdiń baǵaly qaǵazdary men týyndy qarjy quraldary;
• sheteldik brokerlik shottardaǵy qarajat;
• sheteldegi zııatkerlik menshik jáne avtorlyq quqyq obektileri;
• Qazaqstannan tys jerdegi deklaratsııalaýǵa jatatyn debıtorlyq jáne kredıtorlyq bereshek;
• Salyq kodeksinde kózdelgen ózge de múlik.
250.00 nysanyn 15 qyrkúıekke deıin tapsyrý qajet. Alaıda memlekettik jáne saılanbaly laýazymdarǵa kandıdattar, sondaı-aq qarjy naryǵynyń jekelegen qatysýshylary úshin ózge merzimder belgilengen.
270.00 nysanyn kimder tapsyrýy kerek
270.00 nysany – kirister men múlik týraly deklaratsııa. 2026 jyly ol 2025 jylǵy esepti kezeń úshin tapsyrylady.
Deklaratsııany:
• memlekettik qyzmetshiler, olarǵa teńestirilgen tulǵalar jáne olardyń jubaılary;
• zańdy tulǵalardyń basshylary, quryltaıshylary men qatysýshylary jáne olardyń rezıdent jubaılary;
• bankterdiń, saqtandyrý uıymdarynyń jáne baǵaly qaǵazdar naryǵynyń iri qatysýshylary;
• notarıýstar, jeke sot oryndaýshylary, medıatorlar jáne advokattar;
• 2025 jyly jalpy quny 20 000 AEK-ten, ıaǵnı 86,5 mln teńgeden asatyn múlik pen basqa da aktıvterdi satyp alǵan Qazaqstan azamattary tapsyrýy kerek. Bul talap Qazaqstanda da, shetelde de jasalǵan satyp alýlarǵa qatysty;
• tsıfrlyq aktıv ıeleri;
• salyq agentinen belgili bir salyq shegerimderin qoldanǵan tulǵalar;
• óz betinshe deklaratsııalap, salyq tóleýge tıis kirister alǵan azamattar tapsyrady.
Jaǵdaıǵa qaraı deklaratsııada debıtorlyq jáne kredıtorlyq bereshek, salyq shegerimderi, óz betinshe salyq salynýǵa tıis kirister, baǵaly qaǵazdar men sheteldik kompanııalardaǵy qatysý úlesteri, múlikti satyp alý jáne ótkizý týraly málimetter, sondaı-aq sheteldegi deklaratsııalaýǵa jatatyn aktıvter kórsetiledi.
2025 jyl úshin deklaratsııany 2026 jylǵy 15 qyrkúıekten keshiktirmeı tapsyrý qajet.
Deklaratsııaǵa qajetti málimetterdi jınap úlgermese ne isteý kerek
Eger 270.00 nysanyn tapsyrý merzimine deıin barlyq qajetti málimetterdi jınaý múmkin bolmasa, deklaratsııany belgilengen merzimde báribir tapsyrýǵa bolady. Keıin oǵan ózgerister engizýge múmkindik bar.
Buǵan deıin Memlekettik kirister komıteti kólik satýǵa qatysty mysal keltirgen edi.
Deklaratsııany toltyrý kezinde satyp alýshynyń JSN-i men aty-jónin, sondaı-aq mámile somasyn kórsetý qajet. Eger deklaratsııa tapsyratyn kezde bul málimetter qolda bolmasa, keıin qosymsha deklaratsııa usynýǵa bolady.
KGD málimetinshe, bastapqy deklaratsııaǵa osyndaı túzetýlerdi úsh jyl ishinde engizýge bolady.
Deklaratsııa toltyrǵanda qandaı qateler jıi jiberiledi
Qazaqstandyqtar kóbine 270.00 nysanyndaǵy kirister men múlik týraly deklaratsııany toltyrǵan kezde qatelesedi.
Atap aıtqanda, erli-zaıyptylardyń biri olardyń ortaq menshigindegi múlikti satyp alý nemese satý týraly málimetti deklaratsııada kórsetpeı qoıady.
Deklaratsııany qalaı durys tapsyrýǵa bolady
2026 jyldan bastap kúshine engen jańa Salyq kodeksinde eseptilikti tapsyrý tártibine birqatar ózgeris engizildi. Eger deklaratsııa belgilengen merzimde tapsyrylmasa, aqparattyq júıe ony tólenýge tıis salyq somasy nólge teń etip avtomatty túrde toltyrady.
Memlekettik kirister komıtetiniń túsindirýinshe, bul deklaratsııany belgilengen merzimde tapsyrmaǵany úshin habarlama jiberýden, bank shottary boıynsha shyǵys operatsııalaryn toqtatýdan jáne dál merzimin ótkizip alǵany úshin ákimshilik jaýapkershilikten saqtanýǵa múmkindik beredi.
Sonymen birge 2026 jyldan bastap Salyq kodeksinde salyq eseptiligin keri qaıtaryp alý jáne ony tapsyrý merzimin uzartý múmkindigi qarastyrylmaǵan. Sondyqtan deklaratsııany jibermes buryn barlyq málimetti muqııat tekserip, nysannyń belgilengen merzimde tapsyrylǵanyna kóz jetkizý mańyzdy.
Qate jiberilse nemese merzimi ótip ketse, qandaı jaza bar
Deklaratsııany ýaqytynda tapsyrmaǵan jaǵdaıda aldymen eskertý jasalady. Eger bir jyl ishinde osyndaı zańbuzýshylyq qaıtalansa, salyq tóleýshi Ákimshilik quqyqbuzýshylyq týraly kodekstiń 272-baby boıynsha salyq eseptiligin usynbaǵany úshin ákimshilik jaýapqa tartylýy múmkin.
Aıyppul mólsheri:
jeke tulǵalarǵa – 15 AEK, ıaǵnı 64 875 teńge;
jeke notarıýstarǵa, jeke sot oryndaýshylaryna, advokattarǵa, shaǵyn kásipkerlik
sýbektilerine jáne kommertsııalyq emes uıymdarǵa – 30 AEK, ıaǵnı 129 750 teńge.
Tolyq emes nemese durys emes málimetter usynǵany úshin de jaýapkershilik qarastyrylǵan.
Eger deklaratsııadaǵy qate bıýdjetke tólenýge tıis salyqtar men basqa da mindetti tólemderdiń eseptelýine ákelmese, birinshi ret eskertý jasalady. Al bir jyl ishinde qaıtalanǵan jaǵdaıda 3 AEK, ıaǵnı 12 975 teńge mólsherinde aıyppul salynady.
Eger tolyq emes nemese durys emes málimetter saldarynan salyq tóleýshi salyq tóleýge tıis múlikti, kiristi nemese ózge de salyq salý obektisin deklaratsııada kórsetpese, ÁQBtK-niń 275-baby qoldanylady.
Bul jaǵdaıda deklaratsııada kórsetilmegen obekt boıynsha bıýdjetke tólenýge tıis salyqtar men basqa da mindetti tólemder somasynyń 200%-y mólsherinde aıyppul salynady.
