15 qyrkúıek - Qazaqstan Qarýly kúshterinde Tankıster kúni
ASTANA. KAZINFORM - Qazaqstan Qarýly kúshterinde 15 qyrkúıek – brondy tank tehnıkasymen qyzmeti tyǵyz baılanysty áskerı qyzmetshiler men ardagerlerdiń merekesi – Tankıster kúni retinde atap ótiledi.
Bul tehnıka Qurlyq áskerleriniń qýaty men soqqy kúshiniń sımvolyna aınalǵan, dep habarlaıdy QR Qorǵanys mınıstrliginiń baspasóz qyzmeti.
Merekeniń tarıhy Ekinshi dúnıejúzilik soǵys jyldaryna ketedi. 1941 jyly Shymkent temirjoly eńbekkerleriniń bastamasymen respýblıkada tank kolonnasyn qurý úshin qarjy jınaý jumystary uıymdastyryldy. Nátıjesinde, 1942 jyldyń 15 qyrkúıeginde maıdanǵa «Qazaqstan komsomoly» degen jazýy bar 46 tank attandy. Olar mańyzdy shaıqastarǵa qatysyp, Berlınge deıin jetken. Búginde tank áskeri aǵa býynnyń dańqty dástúrlerin jalǵastyrýda.
Qurlyq áskerleriniń bas qolbasshysy general-maıor Mereke Kóshekbaevtyń aıtýynsha, jyl saıyn tankısterdiń kásibıligi men sheberligi artyp, atys tehnıkasy men urys júrgizý taktıkasy jetildirilip keledi.
Armııa generaly Saǵadat Nurmaǵambetov atyndaǵy áskerı kolledjde Tankıster kúnine arnalǵan saltanatty is-shara ótti. Oǵan Qorǵanys mınıstrliginiń basshylyǵy, Qurlyq áskerleriniń qolbasshylyǵy, ardagerler, áskerı qyzmetshiler men kýrsanttar qatysty.
Qorǵanys mınıstri atynan jınalǵandardy onyń orynbasary general-maıor Shaıh-Hasan Jazyqbaev quttyqtady. Óz sózinde ol ardagerler men qazirgi tankısterdiń eldiń qorǵanys qabiletin nyǵaıtýdaǵy rólin atap ótti.
– Qazirgi qaqtyǵystar tank áskerleriniń áli de urys alańyndaǵy sheshýshi kúshterdiń biri ekenin kórsetýde. Tankıster – bul kúshtiń, mashyqtyń jáne úılesimdiliktiń sımvoly, – dedi Qorǵanys mınıstriniń orynbasary.
Mereke aıasynda ardagerler men áskerı qyzmetshilerge alǵys hattar men marapattar tabystaldy. Merekelik is-shara 68665 áskerı bólimi Qurmet qaraýyly rotasynyń defılesi jáne Qarýly kúshter Ulttyq áskerı-patrıottyq ortalyǵy Ortalyq ansambliniń merekelik kontserttik baǵdarlamasymen aıaqtaldy.
Osyǵan deıin Qorǵanys mınıstrliginiń áskerı-klınıkalyq gospıtali zamanaýı jabdyqtarmen tolyqqany týraly jazdyq.