15 qarashadan bastap «Aqtóbe – Qandyaǵash» tasjolynyń bir bóligi aqyly boldy
ASTANA. KAZINFORM - 2026 jylǵy 15 qarashadan bastap respýblıkalyq mańyzy bar «Aqtóbe – Qandyaǵash» avtomobıl jolynyń 89 shaqyrymy aqyly júıege qosyldy, dep habarlaıdy Qazavtojol.
Bul bólik burynnan jumys istep turǵan «Qandyaǵash – Maqat» aqyly jolynyń quramyna engizildi. Nátıjesinde aqyly joldyń jalpy uzyndyǵy 469,5 shaqyrymǵa jetti.
«QazAvtoJol» UK» AQ habarlaǵandaı, joldyń 11+000 jáne 87+200 shaqyrym belgileri aralyǵynda barlyq kólik túrinen aqy alynady. Al qalǵan bóliginde tek avtobýstar men júk kólikteri úshin tólem qarastyrylǵan. Jeńil kólikter tegin júredi.
Jolaqy mólsheri kólik túrine jáne tóleý tásiline baılanysty. Máselen, jeńil avtokólikpen joldyń aqyly bóligin bir baǵytta júrip ótý quny aldyn ala tólegende shamamen 240 teńge, al sapardan keıin tólegende 276 teńge bolady.
Jol boıyna 10 baqylaý arkasy ornatylǵan. Olar kóliktiń memlekettik tirkeý nómirin avtomatty túrde anyqtap, júrip ótkeni úshin tólem esepteıdi.
«QazAvtoJol» jolaqyny aldyn ala tóleý tıimdi ekenin eske salady. Ol úshin kaztoll.kz saıty, bank qosymshalary nemese basqa da resmı tólem servısteri arqyly kóliktiń jeke shotyn aldyn ala toltyrý usynylady.
-Aqyly jolǵa irgeles eldi mekender men aýdandarda tirkelgen kólik ıelerine jeńildetilgen abonementter qarastyrylǵan. Jeńil avtokólikterge arnalǵan jyldyq abonement quny nebári 1 AEK nemese 4 325 teńge. Avtobýstar men júk kólikteri úshin olardyń sanatyna qaraı aılyq jáne jyldyq abonementter usynylady,-delingen habarlamada.
Aqyly joldardan túsken qarajat joldardy kútip ustaýǵa, jóndeýge jáne arnaıy tehnıka satyp alýǵa jumsalady.
«QazAvtoJol» júrgizýshilerge sapar aldynda kóliktiń jeke shotyndaǵy qarajatty tekserip, múmkindiginshe jolaqyny aldyn ala tóleýge keńes beredi.
Jolaqy tarıfteri, tólem tásilderi jáne abonement rásimdeý tártibi týraly tolyq aqparatty kaztoll.kz saıtynan nemese táýlik boıy jumys isteıtin 1403 tegin baılanys nómirinen alýǵa bolady.
Osyǵan deıin Qazaqstannyń aqyly joldaryna 56 lazerlik qurylǵy ornatylǵanyn jazdyq.