15 qarasha. QAZAQPARAT KÚNTІZBESІ: ATAÝLY KÚNDER, OQIǴALAR, ESІMDER
15 qarasha. SENBІ
Qazaqstan Respýblıkasynyń Ulttyq valıýta kúni. Teńgeniń aınalymǵa engen kúni. Qazaqstan Respýblıkasy Prezıdentiniń 1997 jylǵy qarashanyń 13-degi Jarlyǵymen Ulttyq valıýta kúni, elimizdegi qarjy júıesi qyzmetkerleriniń kásibı merekesi bolyp jarııalandy. Ulttyq valıýtany teńge dep ataýdy usynǵan - Halyqaralyq Injenerler akademııasynyń akademıgi, Qazaqstannyń belgili ǵalymy, KSRO Memlekettik syılyǵynyń ıegeri, «Qurmet» ordeniniń kavaleri Saýyq Tákejanov edi.
Brazılııa Respýblıkasy jarııalanǵan kún. 1889 jylǵy 15 qarashada ımperator taǵynan taıdyrylyp, respýblıka - Brazılııanyń Qurama Shtattary jarııa etildi. Jyl saıyn atalyp ótedi.
Dúnıejúzilik geografııalyq aqparattyq júıe kúni (Dúnıejúzilik GAJ kúni). Birqatar amerıkandyq iri kompanııalar men uıymdardyń (Ulttyq geografııalyq qoǵam, USGS, Sun Microsystems, Hewlett-Packard, ESRI jáne t.b.) sheshimimen GAJ kúni jyl saıyn atalyp ótedi. Meıram tóńireginde, apta ishinde ár túrli merekelik sharalar ótedi.
Sıtı-Go-San - Japonııadaǵy balalar merekesi. Aýdarmasy óte qarapaıym: Sıtı - jeti, Go - bes, San - úsh. Bul tarıhy 300 jyldan asqan balalar merekesi.
Palestına Memleketiniń Ulttyq meıramy - Palestına Memleketiniń qurylǵan kúni (1988). 18 jyl buryn Aljırde ótken Palestına ulttyq keńesiniń tótenshe sessııasynda OOP atqarý komıtetiniń tóraǵasy ıAsır Arafat Izraıl basyp alǵan arab jerlerinde táýelsiz Palestına memleketi qurylǵanyn atap ótti. Qazaqstan Respýblıkasy men Palestına memleketi arasyndaǵy dıplomatııalyq qarym-qatynas 1992 jylǵy sáýirdiń 6-synda ornatyldy.
Kot-d'Ivýarede ulttyq beıbitshilik kúni. Ulttyq beıbitshilik kúni - el halqyna jalpy maqsatqa jetý úshin birliktiń mańyzdylyǵyn eske salý úshin merekelenedi
Belgııanyń Ulttyq meıramy - Korol dınastııasynyń kúni (1866). Belgııa - Eýropanyń soltústik-batysynda ornalasqan memleket. Soltústiginde Nıderlandymen, shyǵysynda Germanııa, Lıýksembýrgpen, ońtústiginde jáne ońtústik-batysynda Frantsııamen, soltústik-batysynda Soltústik teńizben shektesedi. Astanasy - Brıýssel qalasy. Memlekettik tili - frantsýz, nemis tilderi. Aqsha birligi - belgııa franki.
ESTE QALAR OQIǴALAR
109 jyl buryn (1905) Qarqaraly qalasynda samoderjavıege qarsy sherý boldy, oǵan jumysshylar, sharýalar, sarbazdar, aýyldan jáne ýez bolystarynan kelgen qazaq jigitteri qatysty
73 jyl buryn (1941) Almaty kınostýdııasy soǵys bastalýyna oraı Qazaqstanǵa kóshirilgen «Mosfılm» jáne «Lenfılm» kınostýdııalarymen qosylyp, Ortalyq kórkem fılmder kınostýdııasy birlestigi (TsOKS) quryldy. Onda kıno óneriniń sheberleri S.Eızensheın, L.Traýberg, S.ıÝtkevıch, F.Ermler, N.Cherkasov, M.Jarov, L.Orlova qyzmet jasady.
23 jyl buryn (1991) Aqmola qalasynda Qazaq mýzykalyq drama teatry Ǵ.Músirepovtiń «Aqan seri - Aqtoqty» tragedııasymen ashyldy. Teatrdyń uıymdastyrýshysy, kórkemdik jetekshisi ári bas rejısseri J.Omarov boldy. Búgingi tańda teatr repertýarynda Ǵ.Músirepovtiń «Qozy Kórpesh - Baıan sulý», «Qyz Jibek», M.Áýezovtiń «Qaragóz», «Qara qypshaq Qobylandy», J.Molerdiń «Skapeniń aılasy», F.Erveniń «Túlki bıkesh», B.Uzaqovtyń «Úmit», Sh.Aıtmatovtyń «Ǵasyrdan da uzaq tún», t.b. spektaklderi bar. Teatrǵa 1993 jyly Qalıbek Qýanyshbaevtyń esimi berildi.
21 jyl buryn (1993) Qazaqstan Respýblıkasynyń ulttyq valıýtasy engizildi.
21 jyl buryn (1993) Qazaqstan Respýblıkasy men Kenııa Respýblıkasy arasyndaǵy dıplomatııalyq qarym-qatynasty ornatý týraly hattamaǵa qol qoıyldy.
15 jyl buryn (1999) quny bes myń teńge banknot aınalymǵa shyǵaryldy.
10 jyl buryn (2004) «Ekopravda» gazetiniń - Qazaqstandaǵy tuńǵysh ekologııalyq gazettiń 500-inshi shyǵarylymy jaryq kórdi.
10 jyl buryn (2004) «Qazaqtelekom» AQ-ny Halyqaralyq Euromoney jýrnaly Ortalyq Azııadaǵy mańdaıaldy kompanııa dep tanydy.
Euromoney qarjy álemindegi jumystar jaıly jarııa etetin Eýropadaǵy eń iri kompanııalardyń biri. Aı saıyn munda halyqaralyq qarjy qaýymdastyǵy «bıznesti damytý úshin mańyzdy» dep baǵalanatyn maqalalar shyǵady.
8 jyl buryn (2006) Varshavada polıak tilinde tuńǵysh ret «Qazaq dalalarynyń ańyzdary» atalǵan qazaq halqy ertegileriniń jınaǵy jaryq kórdi. Bul kitapty Qazaqstanda týyp-ósken, qazir Polshada turatyn polıak-oralmandar - Prezıdent jubaıynyń, Polshanyń birinshi ledıi, panı Marııa Kachınskaıa men Qazaqstan Respýblıkasynyń Polshadaǵy Elshiliginiń qoldaýymen - shyǵarǵan. Ertegilerdi polıak til mamany Aldona ıÝdına aýdarǵan, ertegiler ishindegi túrli-tústi bezendirýlerdi QR Mádenıet jáne aqparat mınıstrligi júzege asyrǵan.
7 jyl buryn (2007) Astanadaǵy Halyqaralyq baspasóz ortalyǵynda «HH ǵasyrdaǵy álem jýrnalıstıkasy» atty kitabynyń tanystyrylymy ótti. Kitaptyń avtory belgili saıası sholýshy jáne jýrnalıst Qýandyq Shamahaı.
Qýandyq Shamahaı - Mońǵolııanyń Baıan-Ólgıı aımaǵynda dúnıege keldi. Mońǵolııanyń Jastar odaǵy jáne Jýrnalıster odaǵy syılyǵynyń laýreaty. 2005 jyldan bastap L.Gýmılev atyndaǵy Eýrazııa ulttyq ýnıversıtetiniń jýrnalıstıka kafedrasynyń dotsenti.
4 jyl buryn 2010) Mınskide Ulttyq kitaphanada brıtandyq jazýshy jáne memlekettik qaıratker Djonatan Aıtkenniń «Nazarbaev jáne Qazaqstannyń qurylýy» atty kitabynyń tusaýkeseri ótti.
4 jyl buryn (2010) Astanada jýrnalıster arasynda «Qazaqstannyń EQYU-ǵa tóraǵalyq etý jyly» atty taqyrypta shyǵarmashylyq baıqaýdyń jeńimpazdary aıqyndaldy.
3 jyl buryn (2011) rejısser Ádilhan Erjanovtyń qazaqstandyq «Rıeltor» fılmi Reseıde «Deboshırfılm - Chıstye grezy-XIV» festıvalinde arnaıy júldege ıe boldy.
3 jyl buryn (2011) AO «Bank RBK» Almatynyń ákimshilik ortalyǵynda óziniń alǵashqy modeldik keńsesin ashty.
3 jyl buryn (2011) Bakýde Atatúrik atyndaǵy ortalyqta Ázerbaıjandaǵy Qazaqstan elshiligi ázerbaıjan tilinde «Qazaqstan joly» atty QR Prezıdenti N. Nazarbaevtyń kitabynyń tanystyrylymy ótti.
3 jyl buryn (2011) Aqtóbede óńirdiń údemeli ındýstrıaldyq-ınnovatsııalyq damý baǵdarlamasyn iske asyrý aıasynda «ıÝjpromsnab» JShS porolon, qosalqy porolonnan buıymdar shyǵaratyn zaýyt ashty.
2 jyl buryn (2012) Astanada «Explore Astana» jýrnalynyń alǵashqy nómiri shyqty.
Jýrnaldyń sheteldegi oqyrmandaryn arttyrý úshin www.exploreastana.kz saıty ashyldy.
2 jyl buryn (2012) QR Prezıdentiniń qaraýyna óńirde hımııalyq salany damý áleýetiniń artýyna, Jambyl oblysynyń áleýmettik-ekonomıkalyq damýynyń artýyna baılanysty «Taraz» hımııalyq parki» arnaıy ekoonomıkalyq aımaǵyn qurý týraly jarlyq jobasy engizildi.
Bul Qazaqstandaǵy onynshy erkin ekonomıkalyq aımaq. Elde joǵary tıimdi tehnologııa negizinde hımııalyq ónimderdiń jańa óndirisin qalyptastyrý maqsatynda onyń qyzmeti 2037 jyldyń 1 qańtaryna deıin josparlanǵan.
Bir jyl buryn (2013) S. Seıfýllın atyndaǵy Qazaq agrarlyq ýnıversıtetinde qazaq shetel jazýshylary kitaptarynyń tanystyrylymy boldy. Qazaqstardyń Dúnıejúzilik qaýymdastyǵynyń qarajaty esebinen shetelde turyp, ana tilinde kitap jazatyn 12 belgili qazaq jazýshylarynyń 60-qa jýyq kitaby shyqty. Olardyń ishinde QHR-dan marqum jazýshy Qajyǵumar Shabdanulynyń 6 tomdyq jınaǵy. Sondaı-aq Mońǵolııa Jazýshylar odaǵynyń múshesi Úzben Qurmanbaıulynyń «Máńgilik el» kitaby. Olardyń barlyǵy S. Seıfýllın atynda,y Qaz ATK kitaphanasynda bar.
Bir jyl buryn (2013) Soltústik Qazaqstan M. Qozybaev atyndaǵy memlekettik ýnıversıtetiniń aǵa oqytýshysy, eńbek sińirgen sport sheberi Vıktor Saıko esimi Gınnestiń rekordtar kitabyna engizildi.
Álem, Eýropa, Azııa chempıonattarynda V. Saıko 20 altyn medal utty, eki jańa álemdik, eýropalyq, azııalyq jáne eýrazııalyq rekord ornatty.
121 jyl buryn (1893) Shveıtsarııanyń eń ataqty fýtbol klýbtarynyń biri - «Bazel» klýbynyń negizi qalandy.
110 jyl buryn (1904) Aýystyratyn lezvııalarmen ustara patentteldi. Onyń ıegeri amerıkalyq Kıng Kemp Jıllett.
80 jyl buryn (1934) KSRO-da alǵashqy dybysty tele baǵdarlama kórsetildi. Qashyqtan beıneli habar kórý adamzattyń ejelden armany bolǵan. Televıdenıe paıda bolý úshin kıno men radıo biriýgi qajet boldy. Praktıkalyq alǵashqy dybysty baǵdarlama 1934 jylǵy 15 qarashada paıda boldy. Ol 25 mınýtqa sozyldy. Estradalyq kontsert kórsetildi. Belgili ártis I.M. Moskvın A.P. Chehovtyń «Qaskúnem» áńgimesin oqydy. Sosyn ánshi án aıtyp, balet juby óner kórsetti.
79 jyl buryn (1935) Fılıppın federatsııasy qurylǵany jarııalandy. Onyń AQSh quramynda avtonomııasy boldy. Tolyq táýelsizdigin tek 1946 jyly aldy.
ESІMDER
152 jyl buryn (1862-1946) nemis dramatýrgi, Nobel syılyǵynyń laýreaty Gerhard GAÝPTMAN dúnıege keldi.
125 jyl buryn (1889-1954) rejısser, Qazaqstannyń eńbek sińirgen ártisi LEONOV-VENDROVSKII Leont Vladımırovıch dúnıege kelgen.
Sankt-Peterbor qalasynda týǵan.
Sankt-Peterbor teatr ýchılışesi men sahna óneri tehnıkýmyn bitirgen.
1940-1954 jyldary Semeı oblystyq mýzyka drama teatrynyń kórkemdik jaǵyn basqardy, bas rejısserlyq qyzmetin atqardy. Osy teatrda M.Áýezovtiń «Qara qypshaq Qobylandysy» men «Syn saǵattasyn», Ǵ.Músirepov pen E.G.Brýsılovskııdiń «Qyz Jibegin», Sh.Qusaıynovtyń «Aldar kósesin», Á.Ábishevtiń «Dostyq mahabbatyn», L.A.ıÝhvıd pen A.B.Aleksandrovtyń «Malınovkadaǵy toıyn», T.G.Shevchenkonyń «Nazar Stodolıasyn», Ý.A.Gadjıbekovtiń «Arshın mal alanyn», t.b. qoıdy.
1 20 jyl buryn (1894-1938) aqyn, jazýshy, dramatýrg MAILIN Beıimbet (Bımuhamed) Jarmaǵambetuly dúnıege keldi.
Qostanaı oblysynda týǵan.
Arǵynbaı qajynyń medresesinde, Qostanaıdaǵy orys-qazaq mektebinde, Ýfadaǵy Ǵalııa medresesinde, Troıtsk qalasyndaǵy Ýázıfa medresesinde oqyǵan.
1923-1925 jyldary Qostanaı gýbernııalyq «Aýyl» gazetinde, 1925-1928 jyldary «Eńbekshi qazaq» gazetinde, 1928-1932 jyldary respýblıkalyq «Aýyl tili» gazetinde ádebı qyzmetker, redaktor boldy. 1932-1937 jyldary - «Sotsıalıstik Qazaqstan» gazetiniń bólim meńgerýshisi, redaktordyń orynbasary, «Qazaq ádebıeti» gazetiniń bas redaktory qyzmetterin atqarǵan.
Ýfadaǵy Ǵalııa medresesinde oqyǵan jyldary tatardyń Ǵ.Ibragımov, M.Ǵafýrı aqyn-jazýshylarmen shyǵarmashylyq baılanysta boldy. Osy oqý ornyndaǵy «Sadaq» qoljazba jýrnalynda «Musylmandyq belgisi» atty tuńǵysh óleńi jaryq kórdi. Onyń alǵashqy shyǵarmalary - «Qostanaı ýezi, Dambar bolysy» ocherki, «Muqtajdyq», «Kóńilime» atty óleńi, «Mal», «Shuǵanyń belgisi» povesi, «Bolǵan is» áńgimesi «Aıqap» jýrnalynda, «Qazaq» gazetinde jarııalandy.
«Kedeıge», «Gúldense aýyl - gúldenemiz bárimiz», «Jazǵy jaılaýda», «Naýryz túlegi», «Kók sıyr», «Bizdiń jastar», «Myrqymbaı», «Áıt, shý... ala atym», «Qarasor», «Ber, Myrqymbaı, qolyńdy!», «Áı, Myrqymbaı», «Baıdyń qyzy», «Rázııa qyz», «Qashqyn kelinshek», «Zaıkúl», «Marjan», «Qandy kek», «Seksen som», «Kúlpash», «Talaq», «Qara shelek», «Aqtalǵan eńbek», «Sary ala ton», «Shapaıdyń haty», «Arystanbaıdyń Muqyshy», «Daýdyń basy - Daırabaıdyń kók sıyry», «Bıǵaıshanyń haty», «Ashtyq qurbany», «Soıqandy sodyrlar», «Kesindiler», «Alyptardy aralaǵanda», «Shuǵanyń belgisi», «Raýshan - kommýnıst», «Azamat Azamatych», «Qyzyl jalaý», «Qońsylar», «Tartys» atty poemalar, feletondar, ocherkter, povester men romandardyń, 25 pesanyń, lıbretto men stsenarıılerdiń avtory.
114 jyl buryn (1900-1974) aýyl sharýashylyǵy ǵylymdarynyń kandıdaty, Qazaq KSR aýyl sharýashylyǵy akademııasynyń korrespondent-múshesi, Qazaq KSR-iniń Eńbek sińirgen ǵylym qaıratkeri BÓRІBAEV Shynqoja Baıekenuly dúnıege keldi.
Qostanaı oblysynda týǵan. Orynbor jumysshy fakýltetin, K.A.Tımırıazev atyndaǵy Máskeý aýylsharýashylyǵy akademııasyn bitirgen.
1962-1972 jyldary - Qazaq KSR Aýyl sharýashylyǵy mınıstrligi ǵylym jónindegi bas basqarmasynyń mamany, bas mamany, ekonomıka bóliminiń bastyǵy bolǵan. 1972 jyldan zeınet demalysyna shyqqan. Ol Qazaqstannyń shyǵys aýdandarynyń keń jaıylymyn paıdalanyp, etti iri qara sharýashylyǵyn órkendetýge jáne KSRO-ǵa shetelderden asyl tuqymdy mal ákelýge zor eńbek sińirgen. «Nagýl krýpnogo rogatogo skota», «Nagýl ı otkorm skota v Kazahstane», «Zımnıı otkorm skota na sılose», «Kombınırovannyı nagýl ı otkorm krýpnogo rogatogo skota» (birlesip shyǵarǵan), «Intensıvnyı otkorm krýpnogo rogatogo skota» (birlesip shyǵarǵan) atty ǵylymı eńbekteri jarııalanǵan.
Eki ordenmen jáne medaldarmen marapattalǵan.
108 jyl buryn (1906-1995) aqyn, jazýshy, aýdarmashy, KSRO jazýshylar odaǵynyń múshesi, Qostanaı qalasynyń qurmetti azamaty HAKІMJANOVA Márııam dúnıegem keldi.
Qostanaı oblysy, Qostanaı aýdany, Qoblandy selosynda týǵan. Rabfakta oqydy (1931-1932). «Áıel teńdigi» jýrnalynda ádebı qyzmetker (1929-1932), jaýapty hatshy (1932-1934). Orynbor oblysy Dambar aýdanynda kitaphana meńgerýshisi (1935-1937), Qazaqstan Jazýshylar odaǵynyń bólim meńgerýshisi (1939-1944), Qazaq memlekettik kórkem ádebıet baspasynda redaktor, aǵa redaktor (1945-59) bolyp istedi.
Tuńǵysh óleńi («Jenotdelge») 1929 jyly, alǵashqy óleńder jınaǵy 1935 jyly jarııalandy. 1945 jyly jeke kitap bolyp shyqqan «Mánshúk» atty poemasy 1947 jyly orys tiline aýdarylyp, basyldy, poema boıynsha jazylǵan telestsenarııi 1963 jyly teledıdar arqyly kórsetildi.
Balalarǵa arnalǵan «Bóbegim meniń - óleńim meniń» atty sýretti kitapshanyń, «Ana meıirimi» (1961) jınaǵynyń jáne birneshe án mátininiń avtory. Qyrǵyz aqyny A.Toqambaevtyń І tomdyq óleńder jınaǵyn aýdaryp bastyrdy (1960). Orystyń balalar jazýshysy I.Dıktiń «Otty bulaq» povesin aýdarǵan (1953). Óleńderi orys, ózbek, qaraqalpaq, qyrǵyz, qytaı, belorýs, armıan, t.b. tilderge aýdaryldy.
Eki ret «Qurmet Belgisi», Eńbek Qyzyl Tý ordenimen, birneshe medaldarmen marapattalǵan. 1986 jyly «Qazaqstannyń Halyq jazýshysy» ataǵy berildi. Almaty qalasy kósheleriniń birine esimi berilgen.
Shyǵarmalary: Jeńeshem. Óleńder. A., QMKÁB, 1935; Mánshúk. Poema. A., QMKÁB, 1945; Ana mahabbaty. Óleńder. A., QMKÁB, 1953; Ana júregi. Óleńder. (orys tilinde.) A., QMKÁB, 1958; Ana kóktemi. Óleńder. A., QMKÁB, 1963; Namys. Tańdamaly. A., «Jazýshy», 1973; Ótkelder. Tańdamaly. A., «Jazýshy», 1976; Perevaly. A., «Jazýshy», 1981.
104 jyl buryn (1910-1997) kórnekti keńes sportshysy, fýtbol jattyqtyrýshysy Mıhaıl ıAKÝShIN dúnıege keldi.
104 jyl buryn (1910-1999) taý-ken ınjeneri, Sotsıalıstik Eńbek Eri, KSRO Memlekettik syılyǵynyń laýreaty, Sátbaev qalasynyń Qurmetti azamaty BÓPEJANOV Muhıt Kuljanuly dúnıege keldi.
Aqtóbe oblysynda týǵan. Máskeý tústi metall jáne altyn ınstıtýtyn bitirgen. 1936-1961 jyldary - Jezqazǵan Ken basqarmasynyń kezekshi ınjeneri, shahta bastyǵy, shahtaqurylys mekemeleriniń ınjeneri, shahta basqarmasynyń bas ınjeneri, kómir shahtasynyń dırektory, aǵa ınjeneriniń orynbasary, aǵa ınjeneri, dırektory. 1961-1963 jyldary - Ońtústik Qazaqstan oblystyq Aýyl sharýashylyǵy keńesi tóraǵasynyń birinshi orynbasary. 1963-1965 jyldary - Ońtústik Qazaqstan oblystyq Aýyl sharýashylyǵy keńesiniń tóraǵasy. 1965-1973 jyldary - Qazaq KSR Tústi metallýrgııa mınıstriniń birinshi orynbasary qyzmetterin atqarǵan. 1973 jyldan zeınet demalysyna shyqqan.
99 jyl buryn (1915-1973) pedagog-ǵalym, fılologııa ǵylymdarynyń doktory, professor, KSRO Pedagogıka ǵylymdary akademııasynyń akademıgi, Keńes Odaǵynyń Batyry, Qazaq KSR-niń eńbek sińirgen ǵylym qaıratkeri, Qazaq KSR Ǵylym akademııasynyń Sh.Ýálıhanov atyndaǵy syılyǵynyń laýreaty ǴABDÝLLIN Málik dúnıege keldi.
Qazirgi Aqmola oblysy Zerendi aýdanynda týǵan. 14 jasynan bastap ataqty jazýshy Sábıt Muqanovtyń tárbıesin alǵan. Abaı atyndaǵy Qazaq pedagogıkalyq ınstıtýtyn bitirgen. Instıtýttan keıin 1935-1937 jyldary áskerı boryshyn ótegen.
1937-1983 jyldary - «Sotsıalıstik Qazaqstan» gazetiniń ádebı qyzmetkeri, «Qazaqstan pıoneri» gazeti redaktorynyń orynbasary, KSRO Ǵylym Akademııasynyń Qazaqstandyq Fılıalyndaǵy Til jáne Ádebıet Instıtýtynyń ǵylymı qyzmetkeri qyzmetterin atqarǵan. 1938-1946 jyldary Abaı atyndaǵy Qazaq pedagogıkalyq ınstıtýtynyń aspıranty bolǵan. 1941-1945 jyldary - General I.V.Panfılov bastaǵan dańqty 28-shi gvardııa dıvızııasy quramynda Uly Otan soǵysyna bastan-aıaq qatysqan. 1942 jyly Novgorod oblysyna qarasty Holm qalasynyń mańynda bolǵan urysta Málik soldattardyń birazyna basshylyq etedi. Ol basqarǵan sarbazdar fashısterdiń tisine deıin qarýlanǵan áskerine toıtara soqqy beredi. Keskilesken urystyń nátıjesinde jaýdyń eki tańkisin granatamen jaryp, jaýdyń 12 soldatyn tutqynǵa alady. Urys kezinde Málik Ǵabdýllın jaraqat alady. alaıda alǵan jaraqatyna qaramastan jaýǵa qarsy oq boratady. Osy erligi úshin KSRO Joǵarǵy Keńesi Prezıdıýmynyń Jarlyǵymen (№ 1035) Málik Ǵabdýllınge 1943 jyldyń 30-qańtarynda Keńes Odaǵynyń Batyry ataǵyn berilip, Lenın ordeni jáne «Altyn juldyz» medalimen marapattalǵan. Soǵystan keıingi jyldary ǵylymı-pedagogıkalyq salada qyzmet atqarǵan. 1946-1951 jyldary - Qazaq KSR Ǵylym akademııasynyń Til jáne ádebıet ınstıtýty dırektorynyń orynbasary, dırektory. 1951-1963 jyldary - Abaı atyndaǵy Qazaq pedagogıkalyq ınstıtýtynyń rektory, 1963 jyldan ómiriniń sońǵy kúnine deıin Qazaq KSR ǴA-nyń M.O.Áýezov atyndaǵy Ádebıet jáne óner ınstıtýty folklor bóliminiń meńgerýshisi qyzmetterin atqarǵan. 1947 jyly «Qobylandy batyr» jyryn ǵylymı zertteýdiń problemalary» degen taqyrypta kandıdattyq dıssertatsııa qorǵady. «Qazaq halqynyń aýyz ádebıeti» degen monografııasynda halqymyzdyń lıro-eposy, batyrlyq jyrlary, ertegi-ańyzdary, turmys-salt óleńderi, jumbaqtar, maqal-mátelder, jańyltpashtar, sýyrypsalma óneri týraly ǵylymı zertteýler men qorytyndylar jasady. Onyń qazaq folklory men ádebıeti týraly jazǵan 100-den astam maqalalary respýblıkamyzdyń gazet, jýrnaldarynda jarııalandy.
Málik Ǵabdýllınniń zerttegen negizgi eńbekteri - qazaq halqynyń batyrlyq epostary, maqal-mátelderi, aıtystary, ergeshileri men halyq ánderi bolady. Qazaq ádebıetiniń kóptomdyq tarıhyn shyǵarýǵa at salysady. Onyń «Qazaqtyń batyrlyq epostary» zertteý eńbegi 1972 jyly Shoqan Ýálıhanov atyndaǵy syılyqqa ıe bolady. KSRO Joǵarǵy Keńesiniń 2-4-shaqyrylymdarynyń depýtaty.
«Meniń maıdandas dostarym», «Altyn Juldyz», «Maıdandyq ocherkter (Frontovye ocherkı)», «Býdnı voıny», «Dostar, joldastar jaıly», «Yzǵarly jyldar (Groznye gody)» atty kórkem ádebı shyǵarmalardyń avtory. Ádebı týyndylary I. P. Şegolıhın kómegimen orys tiline aýdarylǵan. Málik Ǵabdýllınniń Almatyda turǵan úıi men qyzmet atqarǵan Instıtýtynda batyrǵa arnap memorıaldy taqta ornatylǵan. Ózi týyp-ósken aýdandaǵy mektep pen kóshe attary Málik Ǵabdýllınniń esimimen atalady. Kókshetaýda batyrǵa arnalyp arnaıy murajaı ashylǵan. Almaty, Astana jáne Kókshetaý qalalaryndaǵy kóshelerge esimi berilgen.
Lenın ordenimen, «Qyzyl Tý» ordenimen, Birinshi dárejeli Otan soǵysy ordenimen jáne eki ret «Qyzyl juldyz» ordenimen, kóptegen medaldarmen marapattalǵan.
96 jyl buryn (1918-1995) jazýshy JYLQYShIEV Ábjappar dúnıege keldi.
Jambyl oblysynyń Lýgovoı aýdanynda týǵan. Qazaqstan Kompartııasy Ortalyq Komıteti janyndaǵy Joǵary partııa mektebin, KOKP Ortalyq Komıteti janyndaǵy Joǵary partııa mektebin bitirgen. Jambyl oblysy, Lýgovoı aýdandyq partııa komıtetiniń nusqaýshysy, uıymdastyrý bóliminiń meńgerýshisi, Keles aýdandyq partııa komıtetiniń birinshi hatshysy, Ilıchev aýdandyq partııa komıtetiniń ekinshi hatshysy, Georgıevka aýdandyq partııa komıtetiniń birinshi hatshysy, Qyzylqum aýmaqtyq-óndiristik basqarmasy partııa komıtetiniń hatshysy, Alǵabas aýdandyq atqarý komıtetiniń tóraǵasy, Shymkent oblystyq atqarý komıtetiniń baǵa jónindegi bólim meńgerýshisi qyzmetterin atqarǵan. «Aq tolqyn», «Meshin jyly», «Ómir jyry», «Baljan taǵdyry» atty áńgimeler men povesterdiń avtory.
1-shi dárejeli «Otan soǵysy», eki márte «Eńbek Qyzyl Tý», «Qurmet belgisi» ordenderimen, medaldarmen marapattalǵan.
9 6 jyl buryn (1918-1994) pedagogıka ǵylymynyń doktory, professor MEIRAMOV Ǵabdolla Áshimhanuly dúnıege keldi.
Qaraǵandy oblysynyń Ulytaý aýdanynda týǵan. Qazaq memlekettik ýnıversıtetiniń fılologııa fakýltetin bitirgen. 1954 jyldan ómiriniń sońyna deıin Qaraǵandy ýnıversıtetinde aǵa oqytýshy, dotsent, professor, kafedra meńgerýshisi, fakýltet dekany qyzmetterin atqarǵan. Ǵalym qazaq mektepterinde orys tilin ana tiline súıene oqytýdyń jańa ádistemelik júıesin alǵash usynýshylardyń biri boldy. Negizgi ǵylymı eńbekteri osy máseleni zertteýge arnalǵan. Birneshe monografııalar men oqýlyqtardyń, 50-den astam maqalanyń avtory.
92 jyl buryn (1922-2002) prozashy, dramatýrg ADAMBEKOV Sadyqbek dúnıege keldi.
Ońtústik Qazaqstan oblysy, Arys aýdany, Qaraspan aýylynda týǵan. Qyzylorda pedınstıtýtynda dáris alǵannan keıin, 1945-1968 jj. jazýshyjýrnalıstik qalamyn «Ońtústik Qazaqstan», «Qazaq ádebıeti» gazetinde jáne qazirgi «Juldyz», «AraShmel» jýrnalynda qyzmet atqara júrip ushtaıdy. Qazaq satırasy salasynda ózindik orny bólek. «Qojanasyr qaqpasy» (1959), «Kóseniń kózi» (1961), «Aıýbaıdyń ajaly» (1981) sııaqty syqaq jınaqtaryn berdi. Ádebıetimizge tuńǵysh ret «Atylǵan qyz» (1969) atty romansatıra ákeldi. Jekelegen shyǵarmalary shetel tilderine aýdarylǵan. 1982 jyly shyǵarmalarynyń eki tomdyǵy jaryq kórgen.
88 jyl buryn (1926-2002) Keńes Odaǵynyń Batyry, Pavlodar qalasynyń qurmetti azamaty, "Dańq" ordeniniń tolyq ıegeri, Uly Otan soǵysyna qatysýshy PEShIN Petr Vasılevıch dúnıege keldi.
Reseıde týǵan. Jeti synyp btirgen. 1943 jyly Mınsk Qyzyltýly 18-atqyshtar dıvızısynyń 424-polkinde qatardaǵy jaýynger bolyp qabyldandy. Nemis-fashıst shapqynshylaryna qarsy soǵysta Karel, 2-Belarýs jáne 3-Prıbaltıka maıdandaryndaǵy urystarǵa qatysty. Armııada 1953 jylǵa deıin qyzmet etti. Áskerden bosaǵannan keıin Perm oblysynda traktorshy boldy. 1954 jyly Pavlodar oblysyna keldi. Ertis elevatorynyń qurylysyna qatysty. 1986 jyldan zeınetkerlikke shyqty. Soǵys ardageri turǵan Toraıǵyrov kóshesindegi úıdiń qasbetine 1995 jyly eskertkish taqta ornatyldy. Pavlodardyń Birinshi mamyr skverinde Batyrdyń músini ornatylǵan. 5 ordenmen, medaldarmen marapattalǵan.
84 jyl buryn (1930-2000) Qazaqstannyń qoǵam jáne saıası qaıratkeri, Qazaq KSR Memlekettik syılyǵynyń laýreaty BEKTEMІSOV Ánet Imanaqyshuly dúnıege keldi. Almaty oblysy Jambyl aýdanynda týǵan. Máskeý tamaq ónerkásibi tehnologııasy ınstıtýtyn bitirgen.
1955-1958 jyldary - «Donprodstroı» tresti qurylys basqarmasynyń bólim bastyǵy, proraby, masteri. 1958-1960 jyldary - «Almatyturǵynqurylys» tresti ýchaskesiniń bastyǵy, qurylys-montajdaý basqarmasynyń proraby. 1960-1961 jyldary - Qazaq KSR Mınıstrler Keńesi Іs basqarmasynyń referenti. 1961-1963 jyldary - Qazaqstan Kompartııasy Ortalyq komıtetiniń nusqaýshysy. 1963-1964 jyldary - Almaty oblystyq partııa komıteti óndiris bóliminiń meńgerýshisi. 1964-1971 jyldary - Almaty qalalyq partııa komıtetiniń hatshysy, ekinshi hatshysy. 1971-1977 jyldary - Qazaq KSR Aýyr ındýstrııa kásiporny qurylysy mınıstriniń orynbasary. 1977-1988 jyldary - Qazaq KSR-iniń Qurylys isi jónindegi memlekettik komıtetiniń tóraǵasy. 1988-1990 jyldary - Qazaq KSR Memlekettik qurylys tóraǵasynyń birinshi orynbasary. 1990-1993 jyldary - Qazaqstan Respýblıkasy Joǵarǵy Keńesi Qurylys jáne sáýlet máseleleri jónindegi komıtetiniń tóraǵasy. 1993-1996 jyldary - Qazaqstan Respýblıkasy Syrtqy ister mınıstrliginiń Ákimshilik-qarjy basqarmasynyń bastyǵy. 1996-1997 jyldary - Qazaqstan Respýblıkasy Syrtqy ister mınıstriniń keńesshisi qyzmetterin atqarǵan. 1997 jyldan eńbek demalysyna shyqqan.
Almaty qalasyndaǵy Aqbulaq yqsham aýdanyndaǵy kóshege Bektemisov Ánettiń esimi berilgen. Qazaqstan Respýblıkasy Joǵarǵy Keńesiniń 8-9 shaqyrylymynyń depýtaty. Eńbek Qyzyl Tý, eki ret «Qurmet belgisi» ordenderimen, medaldarmen marapattalǵan.
80 jyl buryn (1934) onkolog ǵalym, medıtsına ǵylymynyń doktory, professor, Qazaqstannyń eńbek sińirgen qaıratkeri MUSYLMANBEKOV Qanı Jumkenuly dúnıege keldi.
Qaraǵandy oblysynyń Jańaarqa aýdanynda týǵan. Qaraǵandy memlekettik medıtsına ınstıtýtyn bitirgen.
1957-1972 j. eńbek jolyn Jezqazǵan kenishinde telimdik terapevten bastap, Qaraǵandy oblystyq onkologııa dıpanseriniń bas dárigeri boldy. 1972 jyldan Qaraǵandy memlekettik medıtsına ınstıtýtynda (qazirgi Qaraǵandy medıtsına akademııasy) onkologııa kýrsynyń meńgerýshisi bolǵan.
Negizgi ǵylymı eńbekteri qaterli isikke shaldyqqan naýqastardy hırýrgııalyq jolmen emdeýge arnalǵan. Óńesh, asqazan qaterli isigin hırýrgııalyq jáne terapevtik jolmen emdeý tásilderin jetildirdi. Ol óńeshtegi qaterli isikti sylyp tastaýdyń erekshe ádisin taýyp, sonyń nátıjesinde óńesh qaterli isigimen aýyratyn naýqastardyń operatsııadan keıingi ómirin uzartýǵa múmkindik beretin nátıje aldy. Operatsııadan keıin naýqastardyń ólimin jáne dertiniń asqynýyn azaıtýǵa múmkindik beretin adaptatsııalyq, ınvagınatsııalyq, t.b. anastomozdardyń túrlerin jasady.
13 ónertabystyń avtory, halyqaralyq deńgeıdegi 2 patenti bar, 20 ónertabystyq usynys engizgen.
78 jyl buryn (1936) balalar jazýshysy, aýdarmashy BAıANBAI Qastek dúnıege keldi.
1936 jyly 15 qarashada Almaty oblysynyń Alakól aýdanyndaǵy Taldybulaq degen jerde dúnıege kelgen. Qazaq memlekettik ýnıversıtetinde bilim alǵan. 1960 jyldan bastap Alakól aýdandyq, 1965 jyldan bastap Almaty oblystyq gazet redaktsııalarynda ádebı qyzmetker, bólim meńgerýshisi bolyp istegen. 1971-1995 jj. «Jazýshy» baspasynda redaktsııa meńgerýshisi, «Jalyn» baspasynda Bas redaktor qyzmetterin atqarǵan.
Balalarǵa arnalǵan «Arǵymaq» atty alǵashqy jınaǵy «Jazýshy» baspasynan jaryq kórgen. Óleńderi bastaýysh synyp oqýlyqtaryna, kómekshi quraldarǵa enip, keıbirine ánder jazylǵan, ertegileri boıynsha mýltfılmder túsirilgen, orys, ýkraın, belorýs, ózbek, bolgar, moldovan, túrikmen, ázirbaıjan, lıtvan jáne basqa tilderge aýdarylǵan.
1986 jyly «Tátti sabaq» jınaǵyna І.Jansúgirov atyndaǵy syılyq berilgen.
Belgııa aqyny E.Verharnnyń, bolgar aqyny L.Levchevtiń, orys aqyndary S.Mıhalkovtyń, A.Bartonyń, R.Rojdestvenskııdiń, Z.Aleksandrovanyń, ıakýt aqyny S. Danılovtyń, túrkimen aqyny Q.Táńiriqulıevtiń, moldovan aqyny G.Vıerýdiń jáne t.b. aqyndardyń týyndylaryn qazaqshalaǵan. Eki tomdyq «Orys poezııasynyń antologııasyn» aýdarýǵa qatysqan.
Qazaq KSR Joǵarǵy Keńesiniń Qurmet Gramotasymen, «Eren eńbegi úshin» medalimen (2005) marapattalǵan.
Shyǵarmalary: Arǵymaq. Óleńder. A., «Jazýshy», 1962; Ataı nege solaqaı. Óleńder. A., «Jazýshy», 1964; Adamǵa hat. Óleńder. A., «Jazýshy», 1966; Balalarǵa bazarlyq. Óleńder. A., «Jazýshy», 1966; Shapaǵatty shaq, Óleńder. «Jazýshy», 1968; Ilıch pen ańshy. Óleńder. A., «Jazýshy», 1970; Aq shaǵala. Óleńder. A., «Jazýshy», 1973; Qol shatyr kótergen on batyr. Óleńder. A., «Jazýshy», 1974; Ásem álem. Tańdamaly óleńderi. A., «Jalyn», 1976; Qus súti. Óleńder. A., «Jalyn», 1977; Alaý. Óleńder. A., «Jazýshy», 1978; Zaıchık v ochkah. Stıhı. A., «Jalyn», 1979; Bogatyrı pod dojdem. Stıhı. M., «Detskaıa lıteratýra», 1979; Jol. Tańdamaly óleńderi. A., «Jazýshy», 1982; Tátti sabaq. Óleńder. A., «Jalyn», 1984; Toı. Tańdamaly óleńderi. A., «Jalyn», 1986; Bir qorjyn jaz. Óleńder. A.,»Jalyn», 1991; Júz jyl jaz. Tańdamaly óleńderi. A.,»Balaýsa», 1995; Qus súti. Tańdamaly óleńderi. A., «Jalyn», 1996; Qyryq kún shilde. Óleńder. A., «Raýan», 1997; ıÝrta. Stıhı. A., «Shartarap», 2001; Kempirqosaq. Óleńder. Ast., «Balalar ádebıeti», 2003. Asar. Áńgimeler. «Balalar ádebıeti», A., 2006; 2 tomdyq tańdamaly shyǵarmalary. «Balalar ádebıeti», A., 2007; Arasha. «Rarıtet», A., 2008.
66 jyl buryn (1948) ǵalym, fılologııa ǵylymynyń doktory, professor, Qazaqstan Joǵary mektebi ǵylym akademııasynyń korrespondent-múshesi, Qazaqstan Jazýshylar odaǵynyń múshesi, Qazaqstan Respýblıkasy bilim berý isiniń úzdigi DÁDEBAEV Janǵara dúnıege keldi.
Jambyl oblysynyń Talas aýdanynda týǵan. Taraz qalasyndaǵy Abaı atyndaǵy pedagogıkalyq ýchılışeni, ál-Farabı atyndaǵy Qazaq ulttyq ýnıversıtetiniń fılologııa fakýltetin, Pedagogıkalyq sheberlikti arttyrý ınstıtýtyn, M.Lomonosov atyndaǵy Máskeý memlekettik ýnıversıteti janyndaǵy Biliktilikti arttyrý fakýltetin bitirgen. 1977 jyldan ál-Farabı atyndaǵy Qazaq ulttyq ýnıversıtetiniń qazaq ádebıeti kafedrasynyń assıstenti, aǵa oqytýshysy, dotsenti, Qazaqstan Respýblıkasy Bilim jáne ǵylym mınıstrligi Y.Altynsarın atyndaǵy pedagogıka ǵylymdary ǵylymı-zertteý ınstıtýtynyń (qazirgi Y.Altynsarın atyndaǵy Bilim akademııasy) dırektory bolǵan. 1993-2001 jyldary ál-Farabı atyndaǵy Qazaq ulttyq ýnıversıtetiniń professory, fılologııa fakýltetiniń dekany, qazaq ádebıeti kafedrasynyń meńgerýshisi qyzmetterin atqarǵan. 2001 jyldan atalmysh ýnıversıtettiń oqý jáne ádistemelik ister jónindegi prorektory bolyp isteıdi. Ǵalymnyń 50-tan astam monografııasy, 200-den astam oqýlyqtar men oqý quraldary jaryq kórgen. Ǵalymnyń jetekshiligimen 100-ge jýyq ǵylym kandıdaty men 12 doktory dıssertatsııa qorǵaǵan.
«Qazaqstan Respýblıkasynyń táýelsizdigine 10 jyl» merekelik medalimen marapattalǵan.
64 jyl buryn (1950) jazýshy, dramatýrg, KSRO jáne Qazaqstan Jazýshylar odaǵynyń múshesi BORANBAEV Ómirbek dúnıege keldi.
Shyǵys Qazaqstan oblysy Abaı aýdanynda týǵan. Qurmanǵazy atyndaǵy Qazaqtyń memlekettik óner ınstıtýtynyń teatr fakýltetin bitirgen.
1973-1985 jyldary - Qazaqstan LKJO Ortalyq komıtetinde, Qazaqstan Respýblıkasy Mádenıet mınıstrliginde jaýapty qyzmetter atqarǵan. 1985-1995 jyldary Respýblıkalyq estrada-tsırk ýchılışesiniń dırektory boldy. 1978 jyly «Jalyn» baspasynan «Órimtal» atty áńgimeler jınaǵy jaryq kórdi. 1989 jyly KSRO Jazýshylar odaǵynyń músheligine qabyldanǵan. Dramatýrg retinde «Oń jambas» (komedııa), «Dymyń ishińde bolsyn» (komedııa), «Bárinen kúshti - qorqaq kójek» (ertegi), «Qańbaq shal» (ertegi), «Sotanaıdyń sońǵy úılenýi» (vodevıl), «Bizdiń aýyldyń kóktemi» (drama), «Sháýken» (komedııa), «Kók bóri» (mıstıkalyq drama), «Dúnıe jalǵan» (fars) sııaqty eki aktili pesalar jazǵan. Bul shyǵarmalardyń barlyǵy respýblıka teatrlarynda sahnalanǵan. Qazirgi ýaqytta shyǵarmashylyq jumystarmen aınalysýda. Kóptegen respýlıkalyq baıqaýlardyń júldegeri atanyp, Qazaqstan Respýblıkasynyń Qurmet gramotasymen marapattalǵan
61 jyl buryn (1953) tarıh ǵylymynyń doktory, ál-Farabı atyndaǵy Qazaq ulttyq ýnıversıtetiniń professory TÓLEÝBAEV Ábdesh dúnıege keldi.
Qytaı Halyq Respýblıkasynyń Sháýeshek qalasynda týǵan. Qazaq memlekettik ýnıversıtetin, KSRO ǴA Etnografııa ınstıtýtynyń aspırantýrasyn bitirgen. 1979 jyldan Qazaq ulttyq ýnıversıtetinde qyzmet isteıdi. 1983-1984 jyldary Reseıdiń Orynbor, Astrahan oblystaryndaǵy qazaqtardyń etnografııasyn zerttep, ondaǵy qazaq dıasporasy jóninde «Orynbor qazaqtary» degen eńbek jazǵan. Ol Tarbaǵataıdyń teristik bókterinde ornalasqan aýdandardyń aýmaǵynan, Qalba, Shyńǵystaý óńirlerinen qola, erte temir dáýiriniń buryn belgisiz 400-den astam arheologııalyq keshenin ashty, onyń 60-tan astamyn qazyp zerttedi. Nátıjesinde osy aımaqtarda da beǵazy-dándibaı mádenıeti, úısin mádenıeti jádigerleri bar ekendigi, bul óńirlerdiń basqa arheologııalyq aımaqtarmen mádenı baılanysy, mádenı-etnografııalyq erekshelikteri anyqtaldy. Tóleýbaevtyń sońǵy kezdegi arheologııalyq zertteýleriniń iri jetistigi - Shilikti jazyǵynan altyn kıimdi saq patshasynyń múrdesin ashýy, Úıiktiń erekshe kólemi men záýlimdiligi, kúrdeli arhıtektýrasy, odan shyqqan baı altyn qaptyrmalar, túımeshikter, zerler (barlyǵy 4325 dana) saq bıleýshisiniń erekshe saltanatyn kórsetedi. Tóleýbaev 4 ǵylymı-zertteý jáne tanymdyq kitaptardyń, 3 oqýlyq, 100-den astam ǵylymı-kópshilik maqalalar men ádistemelik quraldardyń avtory.
Onyń «Perejıtkı doıslamskıh verovanıı v semeınoı obrıadnostı kazahov», «Qazaqtyń ádet-ǵuryp, salt-dástúrleri», «Ejelgi Qazaqstan tarıhy» (6-synyp), «Orynbor qazaqtary», «Dala kósemderiniń qazynasy» degen shyǵarmalary bar.
5 5 jyl buryn (1959) QR Investıtsııalar jáne damý mınıstrligi Geologııa jáne jer qoınaýyn paıdalaný komıtetiniń tóraǵasy NURABAEV Bazarbaı Qanaıuly dúnıege keldi.
Qyzylorda polıtehnıkýmyn, Saratov aýyl sharýashylyǵyn mheanıkalandyrý ınstıtýtyn, Qazaq ulttyq tehnıkalyq ýnıversıtetin biátirgen. Tehnıka ǵylymdarynyń doktory. Qazaqstan Respýblıkasynyń Ulttyq ınjenerlik akademııasynyń korrespondent-múshesi. Eńbek qyzmetin 1977 jyly bastady, ınjenerden paıdaly qazbalar ken oryndarynyń geologııalyq-barlaý jáne izdeý jumystary kásiporyndarynyń basshysyna deıingi joldan ótti. 2012 jyldyń naýryz aıynan bastap Qazaqstan Respýblıkasy Indýstrııa jáne jańa tehnologııalar mınıstrligi Geologııa jáne jer qoınaýyn paıdalaný komıtetiniń «Qazgeoaqparat» Respýblıkalyq geologııalyq aqparat ortalyǵynyń basshysy qyzmetin atqardy. 2012 jyldyń jeltoqsan aıynan Qazaqstan Respýblıkasy Indýstrııa jáne jańa tehnologııalar mınıstrligi Geologııa jáne jer qoınaýyn paıdalaný komıtetiniń tóraǵasy qyzmetin atqarǵan. 2014 jyldyń tamyz aıynan bastap QR Investıtsııalar jáne damý mınıstrligi Geologııa jáne jer qoınaýyn paıdalaný komıtetiniń tóraǵasy. 53 jyl buryn (1961) QR-nyń Japonııadaǵy Tótenshe jáne Ókiletti elshisi KAMALDINOV Aqylbek Ábsátuly dúnıege keldi.
Ońtústik Qazaqstan oblysynda týǵan. S.Kırov atyndaǵy Qazaq memlekettik ýnıversıtetin bitirgen. 1990-1992 jyldary - MMÝ janyndaǵy Azııa jáne Afrıka elderi ınstıtýtyndva taǵylymdamashy. 1992-1993 jyldary - QazMÝ-da japon tili oqytýshysy. 1993-1994 jáne 1995-1996 jyldary - QR SІM konsýldyq basqarmasynda jumys jasady. 1994-1995 jyldary - Japonııada tildik taǵylymdamadan ótti. 1996-2001 jyldary - QR-nyń Japonııadaǵy elshiliginde ekinshi, birinshi hatshy. 2001-2003 jyldary - QR SІM bólim bastyǵy, basqarma bastyǵy. 2003 jyldan - QR Premer-Mınıstriniń Keńsesinde syrtqy baılanystar bóliminiń meńgerýshisi. Qazirgi qyzmetinde - 2007 jyldan beri.