15 eldiń saılaý komıssııasynyń tóraǵalary Qazaqstanǵa keledi
«Saılaý naýqany bastalǵaly Ortalyq saılaý komıssııasynyń 25 otyrysy ótti, olar aýmaqtyq saılaý komıssııalarynyń, ýákiletti memlekettik organdardyń jáne BAQ ókilderiniń qatysýymen onlaın ótkizilip keledi. Tikeleı ınternet-translıatsııalar júrgiziledi. Barlyq otyrystarǵa halyqaralyq baıqaýshylar shaqyrylady. Palestına memleketiniń Qazaqstandaǵy Tótenshe jáne Ókiletti Elshisi Montasır Abýzeıd akkredıtteýge birinshi bolyp qujat tapsyrdy. Sonymen qatar, Majarstan, Germanııa, Indonezııa, Kanada, AQSh, Túrkııa, Fınlıandııa, Frantsııa, Shvetsııa, Estonııa sııaqty elderdiń elshileri, Armenııa, Belarýs, Ulybrıtanııa, Irak, Iran, Qytaı, Qyrǵyzstan, Nıderlandy, Reseı Federatsııasy jáne Taıland elshilikteriniń qyzmetkerleri akkredıttelgen», - dedi N. Ábidrov sheteldik dıplomatııalyq korpýs ókilderine arnalǵan brıfıngte.
Onyń aıtýynsha, ekijaqty yntymaqtastyq jelisi boıynsha aldaǵy saılaýdy baqylaý úshin 15 eldiń Ortalyq saılaý komıssııalarynyń ókilderi, onyń ishinde Ázerbaıjan, Armenııa, Qyrǵyzstan, Tájikstan, Túrikmenstan jáne Ózbekstan Ortalyq saılaý komıssııalarynyń tóraǵalary keledi.
Aıta keteıik, QR Premer-Mınıstriniń orynbasary – Syrtqy ister mınıstri Muhtar Tileýberdi men Ortalyq saılaý komıssııasynyń tóraǵasy Nurlan Ábdirov sheteldik dıplomatııalyq korpýs ókilderine aldaǵy Prezıdent saılaýyna daıyndyq týraly baspasóz máslıhatyn ótkizdi.
Prezıdenttik saılaýǵa 10 101 ýchaske ázirlendi, onyń ishinde 53 elde 68 saılaý ýchaskesi quryldy. Saılaýshylar tizimine 11 mıllıonnan astam qazaqstandyq endi.
