15 aqpanda «Qazaqstan daýysy» megajobasynyń jeńimpazy anyqtalady
ASTANA. QazAqparat - «Qazaqstan» telearnasyndaǵy «Qazaqstan daýysy» megajobasy aıaqtalýǵa taıap qaldy. Jaqyn arada telekórermender jeńimpazdy anyqtaıtyn bolady, dep habarlady telearnanyń baspasóz qyzmeti.
Ótken jeksenbide «Qazaqstan» respýblıkalyq teleradıkorporatsııasynyń veb-portalynda ( www.kaztrk.kz ) on-laın rejımde jobanyń tikeleı efırin 45 myńnan astam paıdalanýshy tamashalady. Bul aldyńǵy aptadaǵy kórsetkishpen salystyrǵanda 2 esege artyq. Sheshýshi kún jaqyndaǵan saıyn tartys ta qyza túsýde.
«Qazaqstan daýysy» baıqaýynyń fınalyn «Qazaqstan» telearnasy 15 aqpanda caǵat 21.00-de tikeleı efırde kórsetedi, oǵan tórt úmitker shyǵady. Oryndaýshyǵa qoldaý kórsetý úshin 3075 nomerine ret sany bar SMS joldaýǵa nemese 8 80 90 80 30 75 nomerine qońyraý shalýǵa bolady.
Jeńimpaz 5 mln. teńge men álemge áıgili «Universal» dybys jazý stýdııasymen kelisimshartqa otyrý múmkindigine ıe bolady.
«Qazaqstan» daýysy» jobasy kópshilikke belgisiz talant ıelerin halyqqa tanymal etýdi maqsat etedi. «Qazaqstan daýysynda» eń mańyzdysy - daýys.
Bul joba The Voice of Holland (Nıderlandy) nemese «Golos» túpnusqalyq formatynyń qazaqstandyq nusqasy retinde 2013 jyldyń jazynda bastaldy. «Qazaqstan Daýysy» jobasynyń alǵashqy maýsymynyń jeńimpazy - Qostanaı oblysynyń týmasy 27 jastaǵy Shaharızat Seıdahmet. Oryndaýshynyń tálimgeri - Nurlan Alban.
«Qazaqstan Daýysy» 3 kezeńnen turady. Birinshi kezeń - barlyq qatysýshylardy tyńdaý arqyly ádilqazylardyń árqaısysy tórt top qurady. Ekinshi kezeńde ár túrli toptardyń múshelerinen quralǵan juptyq saıys ótkiziledi. Úshinshi kezeńde jeńimpazdardy halyq SMS-daýys berý arqyly anyqtaıdy.
