1439 baılanys ortalyǵy dári-dármekke qatysty 39 myńnan astam ótinish qabyldady
ASTANA. KAZINFORM – Bıyl «SQ-Farmatsııa» JShS baılanys ortalyǵynyń operatorlary 1439 nómiri arqyly 39 myńnan astam ótinish qabyldady. Qońyraýlar barlyq uıaly jáne qalalyq telefondardan tegin jasalady.
Kóbinese patsıentter emdeýge qajetti dári-dármekpen qamtamasyz etý máseleleri boıynsha habarlasqan. Onyń ishinde: qant dıabeti, epılepsııa, arterııalyq gıpertenzııa, revmatoıdty artrıt, onkologııalyq aýrýlar, ókpeniń sozylmaly obstrýktıvti aýrýy, arıtmııa jáne sklerozǵa qatysty ótinishter jıi túsedi.
Baılanys ortalyǵynyń bastyǵy Baıan Rústembekovanyń aıtýynsha, barlyq ótinishter CRM júıesinde tirkeledi, sóılesý jazbalary saqtalady. Bul monıtorıngtiń ashyqtyǵyn qamtamasyz etip, jumys tıimdiligin arttyrady.
– Baılanys ortalyǵynyń operatorlarynyń medıtsınalyq nemese farmatsevtıkalyq bilimi bar. Bul memlekettik jáne orys tilderinde bilikti keńes berýge múmkindik beredi. Qońyraýlar jumys kúnderi saǵat 09:00-den 18:30-ǵa deıin, senbi kúni 09:00-den 13:00-ge deıin qabyldanady. Jeksenbi – demalys kúni, – dedi ol.
1439 baılanys ortalyǵy tegin medıtsınalyq kómektiń kepildik berilgen kólemi (TMKKK) jáne mindetti áleýmettik medıtsınalyq saqtandyrý (MÁMS) sheńberinde satyp alynatyn dárilik zattar men medıtsınalyq buıymdardyń qoljetimdiligi, jetkizilýi jóninde aqparat beredi. Sondaı-aq dári-dármekterdiń qaldyqtary men naýqastardy naqty medıtsınalyq uıymdarǵa jóneltý kestesi týraly habarlaıdy.
Budan bólek, 1439 nómiri senim telefony qyzmetin de atqarady – azamattar dári-dármekpen qamtamasyz etý salasyndaǵy sybaılas jemqorlyq derekteri týraly da osy arna arqyly habarlaı alady.
Densaýlyq saqtaý mınıstrligi men «SQ-Farmatsııa» qazaqstandyqtardy tegin dári-dármekpen qamtý jumysyn júıeli túrde jalǵastyrýda. Dáriler ambýlatorııalyq deńgeıde – emhanalar arqyly dáriger retsepti boıynsha, al statsıonarlyq deńgeıde – aýrýhanalarda usynylady.
Aıta keteıik, elimizde dári-dármek baǵasy tómendeıdi.