14,3 tonna zalaldanǵan kúnbaǵys tuqymy elge kirgizilmedi
ASTANA. KAZINFORM — Fıtosanıtarııalyq baqylaýdyń arqasynda Qazaqstanǵa zalaldanǵan 14 tonna kúnbaǵys tuqymyn ákelýge jol berilmedi. Bul týraly Aýyl sharýashylyǵy mınıstrligi málim etti.
Karantındik fıtosanıtarııalyq baqylaý jáne qadaǵalaý memlekettik ınspektorlary qaýipti ónimniń ishki naryqqa enýiniń jolyn kesti.
— Belarýs Respýblıkasynan (shyǵarylǵan eli — AQSh) jetkizilgen kólemi 14,3 tonna kúnbaǵys tuqymyn tekserý barysynda onyń kúnbaǵys fomopsısi aýrýymen zalaldanǵany anyqtaldy, — delingen habarlamada.
Bul aýyl sharýashylyǵy daqyldary úshin aıtarlyqtaı qaýipti, ol ónim túsiminiń azaıýyna jáne ónim sapasynyń tómendeýine soqtyrady.
Ónim ıesine qatysty ákimshilik is qozǵalyp, sot qaraýyna jiberildi.
Zııandy ónimderdiń el aýmaǵyna ótýine jol bermeý, shekaradaǵy fıtosanıtarııalyq baqylaýdy kúsheıtý jolynda jumystar jalǵasady.
Eske sala keteıik, byltyr egilgen kúnbaǵys alqaby rekordtyq kórsetkishke jetken bolatyn.