143 myńnan astam túlek mektep bitiredi
ASTANA. 25 mamyr. QazAqparat - Búgin respýblıka mektepterinde oqý jylynyń aıaqtalýyna arnalǵan saltanatty jınalys «Sońǵy qońyraý» merekesi ótedi. Bul týraly Bilim jáne ǵylym mınıstrliginiń baspasóz qyzmetinen habarlandy.
Mınıstrlik málimetterine qaraǵanda, 2013 jyly jalpy bilim beretin mektepterdegi 11-synypty bitirýshileriniń sany 143 myńnan asady. Ulttyq biryńǵaı testileýge qatysý úshin 99 815 túlek ótinishterin bergen. 2012-2013 oqý jylynyń qorytyndysy boıynsha «Altyn belgi» belgisine úmitkerler sany 4678 túlekti quraıdy.
«Sońǵy qońyraý» merekesi aıasynda respýblıka mektepterinde saltanatty jıyndar, merekelik kontsertter, jalpy mektepishilik merekeler, «aǵash otyrǵyzý» aktsııalary, ashyq esikter kúni, bilim berý uıymdarynyń jetistikteri men dástúrlerin jaryqqa shyǵaratyn mektep bitirýshiler keshteri ótkiziledi. Mektep merekelerine pedagogıkalyq eńbek ardagerleri, ata-analar, demeýshiler, qoǵamdyq uıymdar ókilderi shaqyrylady», delingen baspasóz habarlamasynda. Al búgin 25 mamyrda Astana qalasyndaǵy Oqýshylar saraıynda QR Bilim jáne ǵylym mınıstri Baqytjan Jumaǵulovtyń qatysýymen Astana qalasynyń mektepteriniń daryndy balalary - 2012-2013 oqý jylyndaǵy respýblıkalyq jáne halyqaralyq olımpıadalar men ǵylymı jobalar jarystarynyń júldegerleri men jeńimpazdary úshin «Trıýmf» baly ótedi.
