1414 nómiri arqyly jasalatyn alaıaqtyq kóbeıgen

ASTANA. KAZINFORM — Polıtsııa qyzmetkerleri 1414 nómirinen keletin SMS-habarlamalar arqyly jasalatyn alaıaqtyq derekteriniń jıilegenin tirkep otyr. 

Habarlama arqyly kod alǵan azamat birden psıhologııalyq qysymǵa tap bolady: artynsha alaıaqtar qońyraý shalyp, ózderin bank, poshta, salyq organdary nemese quqyq qorǵaý qurylymdarynyń qyzmetkeri retinde tanystyryp, túrli qosymshalardy ornatýǵa nemese kúmándi siltemelerge ótýge úgitteıdi.

— Olar azamattardy «jeke derekterińiz urlandy» dep sendirip, shuǵyl túrde aqsha aýdarýdy nemese nesıe rásimdeýdi talap etedi. Alaıda bul psıhologııalyq aıla ǵana. 1414 nómirinen kelgen SMS nesıelerge qoljetimdilik bermeıdi, sebebi bankter ózderiniń kópsatyly qorǵanys júıelerin qoldanady. Kóbine egde jastaǵy adamdar zardap shegip jatady. Olardy depozıttegi qarajatyn sheship alýǵa, «saqtandyrý shotyna» aýdarýǵa, múlkin satýǵa nemese kepilge qoıýǵa kóndiredi. Alaıaqtar qarajatty kýrerler nemese messendjerler arqyly ıemdenedi, — dedi Almaty qalasy PD kıberqylmysqa qarsy kúres basqarmasynyń bastyǵy Ánes Qaldybaev.

Sonymen qatar spıkerdiń aıtýynsha, ınternet arqyly taýar satý jáne jalǵan ınvestıtsııalyq usynystarǵa qatysty shemalar da keń taralǵan. Qaskóıler tómen baǵa nemese joǵary tabys ýáde etip, aldyn ala tólem talap etedi, keıin baılanysqa shyqpaı qoıady.

Sondaı-aq «týysyńyz jol-kólik oqıǵasyna tústi» degen mazmundaǵy qońyraýlar arqyly emotsıonaldyq qysym jasap, aqsha bopsalaý faktileri kezdesedi.

— Eń basty qaǵıda — jeke derekterińizdi, bank kartalarynyń rekvızıtterin jáne kelgen kodtardy eshkimge habarlamaý. Qońyraý shalýshy ózin bank nemese polıtsııa qyzmetkeri retinde tanystyrsa da, aqparatty ózińiz derbes tekserińiz. Psıhologııalyq qysym men manıpýlıatsııaǵa berilmeńiz, — dep atap ótti Ánes Qaldybaev. 

Aıta ketelik Oralda kıberalaıaqtar turǵynnyń 5 mıllıon teńgesin jymqyrǵany týraly jazǵan edik.