1414 qaýyrt jelisi jumysyna tartylǵan psıhologtarǵa qurmet kórsetildi

NUR-SULTAN. QazAqparat - Búgin Azamattyq bastamalardy qoldaý ortalyǵynyń Basqarma tóraıymy Lıma Dıas Tótenshe jaǵdaı kezinde 1414 qaýyrt jelisi arqyly qazaqstandyqtarǵa qoldaý kórsetken psıholog mamandarǵa alǵys hattardy tabystady, dep habarlaıdy QR Aqparat jáne qoǵamdyq damý mınıstrliginiń baspasóz qyzmeti.

Eske salaıyq, qańtar aıynyń basynda QR Aqparat jáne qoǵamdyq damý mınıstrligi QR Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, 1414 biryńǵaı koll-ortalyǵy bazasynda jeke telefon jelisin qurǵan bolatyn. Munda elimizdiń kómekke muqtaj turǵyndaryna kásibı psıhologııalyq kómek kórsetildi.

Qaýyrt jeli nómirine habarlasqan barlyq qazaqstandyqtarmen táýlik boıy 38 kásibı psıholog jumys istedi.

«Tótenshe jaǵdaı jarııalanǵan alǵashqy kúnderde bizdiń qyzmetkerler áleýmettik jeliler arqyly qaýyrt jeliniń jumysyna kásibı psıhologtardy tartý qajettigin habarlap, mamandarǵa izdeý salǵan bolatyn. Bizdiń ótinishimizdi jerge tastamaı, azamattarǵa kómek kórsetýge nıet bildirgender az bolǵan joq. Volonter retinde jumys isteýge daıyndyǵyn kórsetken barlyq psıhologtarǵa biz kómekke júgingen turǵyndarǵa qoldaý kórsetkeni úshin óz alǵysymyzdy aıtamyz», - dedi Azamattyq bastamalardy qoldaý ortalyǵynyń Basqarma tóraıymy Lıma Dıas.

Zarına Kenjeqar jedel jeli jumysyna alǵashqylardyń biri bolyp qosyldy. Ol – tájirıbeli psıholog.

«Psıhologtardyń kómegi qajet ekenin men jalpy chattan bilgen soń bul jumysqa birden kirisip kettim. Meniń aǵam áskerı adam bolǵandyqtan, men jaǵdaıdyń óte qıyn ekenin bildim. Azamattar ár túrli máseleler boıynsha qońyraý shalsa, jadymda Almaty qalasynan habarlasqan turǵynnyń oqıǵasy erekshe saqtalypty. Ol qaýyrt jelige túngi ýaqytta habarlasyp, óziniń eki balasymen atys júrip jatqan jerdiń mańaıynda turatynyn jáne ózi úshin emes, balalary úshin alańdaıtynyn aıtty. Túngi ýaqytta qorqynysh degen sezim kúsheıe túsedi ǵoı. Men bul áıelge de, kómegimizge júgingen basqa azamattarǵa da mazasyzdyqty jeńýge, psıhologtardyń arnaıy ádisterin qoldana otyryp, barynsha qoldaý kórsetýge tyrystym», - deıdi Zarına Kenjeqar.

Psıhologııalyq qoldaý baǵytyndaǵy jumys odan ári jalǵasatyn bolady. Azamattyq bastamalardy qoldaý ortalyǵy Basqarma tóraıymynyń aıtýynsha, endi jappaı tártipsizdikterdiń kýási bolǵan jáne psıhologtardyń kásibı kómegine muqtaj balalar men jasóspirimderge kómek kórsetilmek.