1414 Biryńǵaı baılanys ortalyǵy bir mezgilde myńnan astam adamǵa qyzmet kórsete alady
NUR-SULTAN. QazAqparat - QR Tsıfrlyq damý, ınnovatsııalar jáne aeroǵarysh ónerkásibi mınıstrligi «UAT» AQ, «Azamattarǵa arnalǵan úkimet» KEAQ jáne «Qazaqtelekom» AQ birlesip, QR 1414 Biryńǵaı baılanys ortalyǵynyń jumysyn kúsheıtti, dep habarlaıdy QazAqparat.
«Bir ýaqytta 1 myńnan astam abonent qajetti suraqtaryna keńes ala alady. Bul sharalar koronavırýstyń taralýyna baılanysty tótenshe jaǵdaı tártibiniń engizilýine, sondaı-aq ınfektsııanyń taralmaýyna jol bermeý úshin Halyqqa qyzmet kórsetý ortalyqtarynda qorǵanys sharalaryn engizýge baılanysty qabyldandy. Qazirgi jaǵdaıǵa baılanysty, Tsıfrlyq damý mınıstrligi azamattarǵa memlekettik qyzmetterdi onlaın alýǵa keńes beredi. Búgingi tańda memlekettik qyzmetterdiń 80 paıyzy elektrondyq úkimet portaly arqyly qoljetimdi. Qajetti anyqtamalardy eGov Mobile mobıldi qosymshasy jáne telegramdaǵy bot arqyly alýǵa bolady», delingen habarlamada.
Osy oraıda memlekettik qyzmetterdi alý barysyna qandaı da bir qıyndyqtar men suraqtar týyndaǵan jaǵdaıda, azamattar 1414 Biryńǵaı baılanys ortalyǵyna uıaly jáne statsıonarly telefonnan habarlasa alady. Qońyraý soǵý tegin.
Biryńǵaı baılanys ortalyǵynyń kúsheıtilgen tártipte jumys isteýi úshin «Azamattarǵa arnalǵan úkimet» MK» KEAQ front-keńseleriniń 600 qyzmetkeri jumysqa tartyldy. Jaqyn arada olardyń sanyn arttyrý josparlanýda.
