1414 baılanys ortalyǵyna bir kúnde 600 myń adam habarlasqan
NUR-SULTAN. QazAqparat - Elimizde tótenshe jaǵdaıdyń jarııalanýyna baılanysty 1414 biryńǵaı baılanys ortalyǵy qyzmetkerler sanyn 200-den 2000-ǵa deıin arttyrdy, dep habarlaıdy QazAqparat tilshisi.
Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Abylaıhan Ospanov aıtyp berdi.
«26 naýryzdan bastap elimizdiń barlyq óńirinde halyqqa qyzmet kórsetý ortalyqtary ýaqytsha jumysyn toqtatyp, Elektrondy úkimet portalyna aýystyryldy. Onlaın qyzmet alý týraly halyqqa úzdiksiz keńes berý úshin 1414 biryńǵaı baılanys ortalyǵynyń qyzmetkerler sany 200-den 2000-ǵa deıin kóbeıdi», - dedi vıtse-mınıstr Ortalyq kommýnıkatsııalar qyzmetinde ótken brıfıngte.
Onyń aıtýynsha, bul qyzmetke Azamattarǵa arnalǵan úkimet korporatsııasynyń front-keńselerinde konsýltatsııa bergen mamandar tartylǵan.
«Baılanys ortalyǵyna habarlasa almaǵan azamattardyń shaǵymyn da estidik. Jaı kúnderi 1414 nómirine bir kúnde túsken eń kóp qońyraý 25-30 myń aralyǵynda bolsa, qazirgi ýaqytta 600 myń qońyraýǵa deıin tirkeldi. Jyl basynan beri bul ortalyq 4 mln adamǵa keńes bergen», - dedi A. Ospanov.
Qazirgi ýaqytta barlyq memlekettik qyzmetterdiń 80 paıyzyn elektrondy túrde alýǵa bolady. Jyl sońyna deıin elektrondy qyzmetter úlesin 90 paıyzǵa jetkizý josparlanǵan. .
«Ótken jyly Elektrondy úkimet portalynda 47 mln astam qyzmet elektrondy túrde kórsetildi. Bul kórsetkish 2018 jylmen salystyrǵanda, 57 paıyzǵa artyq. Halyqqa qyzmet órsetý ortalyqtary men Azamattarǵa arnalǵan úkimet korporatsııasynda byltyr 27 mln qyzmet kórsetildi. Bul 2018 jylǵy qyzmetten 4,5 mln-ǵa azyraq. ıAǵnı, memlekettik qyzmetti onlaın túrde alýshylar sany artyp keledi», - dedi Abylaıhan Ospanov.
