1411 aqparat ortalyǵy on kúnde 26 myńnan astam halyqqa qyzmet kórsetti

NUR-SULTAN. QazAqparat – Bıyldan bastap 24/7 rejımine kóshken «1411» baılanys ortalyǵy arqyly 10 kúnniń ishinde 26 myńnan astam otandasymyzǵa eńbekpen qamtý jáne áleýmettik qoldaýǵa qatysty aqyl-keńes berildi, dep habarlaıdy QazAqparat.

«Jańa jyldyń aldynda «1411» baılanys ortalyǵynda boldym. Ol 1 qańtarda jumysyn bastady. Baılanys ortalyǵy 10 kún boıy shtattyq rejimde jumys istedi. Osy ýaqyt aralyǵynda «1411» baılanys ortalyǵy 26 myńnan astam adamǵa eńbekpen qamtý jáne áleýmettik qorǵaý boıynsha konsýltatsııa berdi. Búgin atalǵan ortalyqqa baryp, materıaldyq-tehnıkalyq bazany jabdyqtaý jáne operatorlardy oqytý men qyzmet kórsetý sapasyn arttyrý boıynsha aýqymdy jumys atqarylǵanyna kózim jetti. Qandaı da bir suraqtaryńyz bolsa «1411» baılanys ortalyǵyna qońyraý shalyńyzdar, ol táýlik boıy jumys isteıdi», - dep jazdy QR Eńbek jáne halyqty áleýmettik qorǵaý vıtse-mınıstri Narıman Muqyshev óziniń Facebook paraqshasynda.

Buǵan deıin atalǵan aqparat ortalyǵynyń táýlik boıy qyzmet kórsetetinin habarlaǵan bolatynbyz.