1403 baılanys ortalyǵyna bir aptada 18 myńnan astam ótinim túsken
ASTANA. KAZINFORM – 8-14 maýsym aralyǵynda 1403 baılanys ortalyǵy respýblıkalyq mańyzy bar avtojoldarǵa qatysty 18 myńnan astam ótinimdi qabyldap, óńdedi.
«QazAvtoJol» ulttyq kompanııasynyń málimetinshe, júrgizýshiler negizinen aqyly joldardaǵy tólem máseleleri, buzylǵan kólikterdi evakýatsııalaý jáne jol ınfraqurylymyna qatysty ózge de saýaldar boıynsha habarlasqan.
Interaktıvti daýystyq mázir (IVR) júıesiniń kómegimen 1 407 ótinim operatorlardyń qatysýynsyz avtomatty túrde óńdelgen. Sonymen qatar baılanys ortalyǵynyń operatorlary 15 551 qońyraýǵa jaýap berip, messendjerler arqyly túsken 1 191 ótinimdi qaraǵan.
«Baılanys ortalyǵy azamattarǵa jedel aqparat berý jáne jol paıdalanýshylarynyń suranystaryna ýaqytyly jaýap berý baǵytynda úzdiksiz jumys isteıdi. Bir apta ishinde 18 myńnan astam ótinim qabyldanyp, olardyń barlyǵy belgilengen reglamentke sáıkes óńdeldi. Eń kóp habarlamalar Aqmola, Túrkistan jáne Qaraǵandy oblystarynan kelip tústi», – dep habarlady ulttyq kompanııa.
Kompanııa málimetinshe, respýblıkalyq joldarǵa qatysty aqparat alý úshin azamattar 1403 baılanys ortalyǵyna, resmı ınternet-resýrsqa, Telegram-bottarǵa jáne WhatsApp messendjerine júgine alady.
Aıta keteıik, «TazaQazBot»-qa 44 myńnan astam ótinim túsken.
