1403 baılanys ortalyǵy bıyl júrgizýshilerden 850 myńnan astam ótinim qabyldady
ASTANA. KAZINFORM – 2026 jyldyń jeti aıynda 1403 baılanys ortalyǵy respýblıkalyq mańyzy bar avtomobıl joldaryna qatysty 850 myńnan astam ótinimdi qabyldap, óńdedi, dep habarlaıdy «QazAvtoJol» ulttyq kompanııasy.
Júrgizýshiler negizinen aqyly joldardaǵy tólem máseleleri, joldardyń jaı-kúıi, buzylǵan kólikterdi evakýatsııalaý jáne ózge de mańyzdy máseleler boıynsha habarlasqan.
Interaktıvti daýystyq mázir (IVR) júıesiniń kómegimen 251 myń ótinim operatorlardyń qatysýynsyz avtomatty túrde óńdeldi. Sonymen qatar baılanys ortalyǵynyń mamandary 551 myń qońyraýǵa jaýap berip, messendjerler men daýystyq habarlamalar arqyly kelip túsken 50 myńnan astam ótinimdi qaraǵan.
«Respýblıkalyq mańyzy bar avtomobıl joldary boıynsha eń kóp ótinim Aqmola, Túrkistan, Qaraǵandy jáne Jambyl oblystarynan tirkeldi. Barlyq ótinimder belgilengen reglamentke sáıkes ýaqytyly qaralyp, tıisti sharalar qabyldandy», – dep málimdedi ulttyq kompanııa.
Júrgizýshiler 1403 baılanys ortalyǵy, resmı saıt, Telegram-bottar jáne WhatsApp messendjeri arqyly táýlik boıy aqparat alyp, ótinim qaldyra alady.
Aıta keteıik, buǵan deıin bul kórsetkish bir aptada 18 myńnan astam bolatynyn jazǵanbyz.
