140 myń adamdy medıtsınalyq uıymdarǵa jalǵan tirkegen: saqtandyrý qorynan qarjy jymqyrǵandar ustaldy
ASTANA. KAZINFORM – Qarjylyq monıtorıng agenttigi shamamen 140 myń azamatty medıtsınalyq uıymdarǵa jalǵan tirkeý jáne kórsetilmegen medıtsınalyq qyzmetter týraly jalǵan málimet engizý arqyly Áleýmettik medıtsınalyq saqtandyrý qorynan zańsyz qarjy alý shemalaryn anyqtady.
Osy derekter boıynsha 36 qylmystyq is tergelip jatyr. Aldyn ala esep boıynsha memleketke keltirilgen shyǵyn 3,5 mlrd teńgeden asady. Máselen, Túrkistan oblysynda Jetisaı kópsalaly aýdandyq aýrýhanasynyń laýazymdy tulǵalaryna qatysty tergeý júrgizilip jatyr.
Tergeý málimetine sáıkes, mindetti áleýmettik medıtsınalyq saqtandyrý (MÁMS) aıasynda bólingen qarajat is júzinde eshqandaı qyzmet kórsetpegen ári taýar jetkizbegen 20-dan astam jeke kásipkerdiń esepshottaryna aýdarylǵan.
Kásipkerler medıtsınalyq mekememen eshqandaı shart jasaspaǵan. Al olardyń derektemeleri aqshany zańsyz shyǵaryp, keıin qolma-qol aqshaǵa aınaldyrý úshin paıdalanylǵan.
Memleketke keltirilgen shyǵyn 501 mln teńgeden asty. Eki kúdikti qamaýǵa alyndy.
Astanada «Forte Clinic» JShS jeke klınıkasynyń basshysy Áleýmettik medıtsınalyq saqtandyrý qorynan zańsyz qarjy alý shemasyn uıymdastyrǵany úshin 5 jylǵa bas bostandyǵynan aıyryldy. Al onyń sybaılasy – Densaýlyq saqtaýdy damytýdyń ulttyq ǵylymı ortalyǵynyń qyzmetkeri azamattardy tirkeýge qatysty ótinimderdi zańsyz maquldaǵany úshin 3 jylǵa sottaldy.
Qylmystyq shema nátıjesinde klınıkaǵa 15 myńnan astam azamat zańsyz tirkelgen. Sonymen qatar «Damu Med» aqparattyq júıesi arqyly 79 mln teńgeniń jalǵan medıtsınalyq qyzmeti rásimdelgen.
Almaty oblysynda «Mydental.kz» JShS men «Stomatologııa Dr. Nurzhanova» JShS klınıkalarynyń basshysy stomatologııalyq qyzmet kórsetý kezinde alaıaqtyq jasaǵany úshin múlki tárkilenip, 4 jylǵa bas bostandyǵynan aıyryldy.
Shyn máninde patsıentterge eshqandaı qyzmet kórsetilmegen. Al qujattardy rásimdeý úshin dárigerlerdiń tirkelgi jazbalary men kámeletke tolmaǵan patsıentterdiń jeke derekteri paıdalanylǵan.
Nátıjesinde jalǵan medıtsınalyq qyzmet kórsetýdiń 4,5 myńnan astam deregi anyqtalyp, memleketke 66 mln teńge shyǵyn keltirilgen.
Bul baǵyttaǵy jumys jalǵasyp jatyr.
Qyzylordada medıtsınalyq uıymdar 21 mln 784 myń teńgeden astam aıyppul óndirgenin jazǵan edik.
