140 ball alǵanymdy bilgende qatty tańǵalmadym — qyzylordalyq túlek
QYZYLORDA. KAZINFORM – Mektep bitirýshilerdiń bilim jarysynda eń joǵary upaı – 140 ball enshilegen talapkerler elimiz boıynsha sanaýly ǵana. Sonyń biri – Qyzylorda oblysynyń Shıeli aýdanynda ornalasqan Shoqan Ýálıhanov atyndaǵy №127 orta mektep-lıtseıdiń túlegi Káýsar Altynsary.
Káýsar – egizdiń syńary. Onymen birge mektep bitirgen Gaýhar ulttyq biryńǵaı testileý nátıjesinde 139 ball alyp, ekeýi birdeı aımaq mereıin ústem etti.
Bilim básekesinde qatarlastarynan oq boıy ozyp shyqqan Káýsar Altynsary Kazinform tilshisimen suhbatta eń joǵary kórsetkishti ıelenýdiń qupııasyn bólisti.
- Egiz túlekterdiń eń joǵary ball jınaýy erekshe áserli boldy. UBT-ǵa qalaı, neshe jyl úzbeı daıyndaldyńyzdar?
- UBT-ǵa 10-synyptan bastap daıyndaldyq. Odan keıin IELTS emtıhanyn tapsyryp, 11-synypta kýrsqa qatysý arqyly daıyndyqty kúsheıttik.
- Joǵary ball alatynyńyzǵa ekeýińiz de sendińizder me? Qorytyndyny kórgennen keıingi reaktsııa qandaı boldy? Qýanyshty jańalyqty birinshi kim estidi?
- Ózimniń joǵary deńgeıde bolatynyma áý bastan sengenmin. Sol sebepti 140 ball alǵanymdy kórgende qatty tańǵaldym dep aıta almaımyn. Gaýhar da dál osyndaı kúıdi bastan ótkergen. Test qorytyndysy týraly eń birinshi ákeme aıttym, áýelgide múldem senbedi. Ákemniń qýanǵanyn kórgennen keıin ǵana kóńil kúıim birden kóterildi.
- Tańdaý páni, bolashaq mamandyq qandaı? Ustazdaryńyzdyń eńbegin atap ótseńiz. Ata-anańyz qalaı qoldaý kórsetti?
- Tańdaý pánim — dúnıe júzi tarıhy men aǵylshyn tili kombınatsııasy. Gaýhar ekeýimizdiń de tańdaǵan mamandyǵymyz — aǵylshyn tili pániniń muǵalimi. Ustazdaryma sheksiz alǵys bildirgim keledi. Tek pán boıynsha bilim berýmen shektelmeı, boıymyzǵa adamı qasıetterdi darytýǵa yqpalyn tıgizdi. Synybymyzǵa qandaı ball alsaq ta árdaıym qoldaý kórsetip, alǵa umtylýǵa jiger berip keldi. Muǵalimderimniń meıirimdiligine, sabyrlylyǵyna, janashyrlyǵyna raqmet. Árıne, qandaı synaqta da otbasymnyń qoldaýyn sezinemin. Biz úıde úsh balamyz, aǵam Nazarbaev ýnıversıtetinde oqyp jatyr. Ákem de, anam da pedagogıka salasynda eńbek etedi.
- UBT-da túlektiń psıhologııalyq turaqtylyǵy mańyzdy, ıaǵnı kóbi aýdıtorııaǵa kirgende qobaljyǵannan bilgenin umytyp qalýy múmkin. Sizderde qalaı boldy?
- Qobaljý árdaıym bolady, bul — qalypty nárse. Biraq ózińdi der kezde qolǵa alyp, úreıge boı aldyrmaý mańyzdy. Qańtar aıynda ótken UBT-ǵa kirerde mende ýaıymdaý basym boldy. Tájirıbe jınaqtaǵannan keıin abyrjýdy azaıttym. Senimsizdik kóbine keıinge tartady, sondyqtan mektep bitirýshilerge «ózderińizge, bilimderińizge senińizder» dep aıtqym keledi.
- UBT-ǵa daıyndalýdyń qandaı erekshe ádisi bar? Ózińiz sııaqty mektep bitirýshilerge qandaı keńes beresiz?
- UBT-ǵa daıyndyqta eń basty nárse ol – turaqtylyq. Adam sharshaý, motıvatsııa, kóńil kúıdiń joqtyǵy sekildi faktorlarǵa táýeldi bolmaýy kerek. Erinshektigińdi jeńe almasań, UBT-da ǵana emes, ómirde de arman-maqsatqa jetý qıyn. Adamdy alǵa jeteleıtin — tártip, al motıvatsııa ýaqytsha. Eki jyl boıy úzbeı daıyndalý nátıjesinde kókeıge túıgenim — osy. Bolashaq túlekterge kez kelgen eńbek aqtalatynyn, tek kúndelikti áreket etýdi toqtatpaý keregin aıtqym keledi. «Ózińe sen, ózińdi alyp shyǵar, eńbegiń men aqylyń eki jaqtap» dep Abaı atamyz aıtqandaı, tek úlken eńbek joǵary jetistikke aparady.
- Aǵylshyn tilinen jetik bolýdyń syryn bólisseńiz.
- Aǵylshyn tilin úırengende eń basty shart — sol tilmen ózińdi barynsha qorshaý. Ol degenimiz — barlyq áleýmettik jelini sol tilge aýystyrý, kúndelikti tek aǵylshynsha kontent kórý jáne tártip.
Qyzylorda oblystyq bilim basqarmasy buǵan deıin egiz túlekterdiń bul jetistigin tabandylyqtyń, tynymsyz eńbektiń jáne bilimge degen qushtarlyqtyń jemisi dep kórsetti.
