140 adam, 33 tehnıka, 3 dron: Abaı oblysyndaǵy órtke jetisýlyq qutqarýshylar tartyldy
ASTANA. KAZINFORM — Abaı oblysy Maqanshy aýdanynda, Qabanbaı aýyldyq okrýginiń Uzynbulaq ýchaskesinde eldi mekennen 22 shaqyrym qashyqtyqta batpaqty jerdegi ashyq aýmaqta qurǵaq shóp pen qamys órtendi, dep habarlaıdy TJM baspasóz qyzmeti.
Oqıǵa ornynda Abaı jáne Jetisý oblystary TJD, «Aýyl qutqarýshylary» órt sóndirý beketteri jáne jergilikti atqarýshy organdardyń kúshteri jumys istep jatyr. Barlyǵy 140 adam, 33 tehnıka jáne 3 ushqyshsyz ushý apparaty jumyldyrylǵan.
— Qazir óńirdegi qurǵaq shóp pen qamystyń janýy oqshaýlandy. Eldi mekenderge qaýip joq. Órtti sóndirý jumystary jalǵasyp jatyr. Jaǵdaı TJM baqylaýynda, — delingen vedomstvo taratqan aqparatta.
Buǵan deıin Jetisýdaǵy órtti sóndirýge tikushaqpen 11,4 tonna sý tógilgenin jazdyq.
