14 jeltoqsannan bastap Astana – Omby baǵytynda poıyz qatynaıdy
ASTANA. KAZINFORM — Bıylǵy jyldyń 14 jeltoqsanynan bastap №145/146 «Astana – Omby» jolaýshylar poıyzy jolǵa shyǵady. Bul týraly «Jolaýshylar tasymaly» AQ baspasóz qyzmeti málim etti.
Kompanııanyń málimetinshe, poıyz aptasyna úsh ret – seısenbi, juma jáne jeksenbi kúnderi qatynaıdy. Quramynda 3 kýpe jáne 5 platskart vagony bar. Bir baǵytta shamamen 400 jolaýshyny tasymaldaýǵa múmkindik beredi. Jańa baǵyttyń ashylýy – halyqtyń kólikpen qatynaý múmkindigin arttyrýǵa, vagondar parkin tıimdi paıdalanýǵa jáne marshrýttyq jelini keńeıtýge baǵyttalǵan. Poıyz zamanaýı, qaýipsizdik jáne jaılylyq talaptaryna tolyq saı vagondardan jasaqtalady.
Bıletterdi bilet.railways.kz resmı saıtynan nemese temirjol vokzaldarynyń bılet kassalarynan satyp alýǵa bolady. Qosymsha aqparat alý úshin 1433 baılanys ortalyǵyna habarlasý qajet. Poıyz qozǵalysy týraly málimetter https://tablo-railways.kz/ru/ saıtyndaǵy onlaın-tabloda qoljetimdi.
Eske sala keteıik, buǵan deıin Almaty — Tashkent baǵytynda Talgo poıyzy qatynaıtynyn jazǵan edik.
