14 jastaǵy jasóspirimniń ólimi: Aqtóbede 6 oqýshy sottaldy
AQTÓBE. KAZINFORM – Úsh oqýshy 6 jyl 8 aıǵa bas bostandyǵynan aıyryldy. Taǵy úsh oqýshy jazasyn bostandyqta júrip óteıdi.
Aqtóbe oblystyq kámeletke tolmaǵandardyń isteri jónindegi mamandandyrylǵan aýdanaralyq sotynda oqýshy Nurjan Sydyqtyń ólimine qatysty is qaraldy. Sottalýshylardyń bári de Qopa orta mektebiniń 10 jáne 11 synyp oqýshylary. Olarǵa Qylmystyq kodekstiń «Densaýlyqqa qasaqana aýyr zııan keltirý», «Buzaqylyq», «Qylmystyq quqyq buzýshylyqqa sybaılas qatysýshylardyń túrleri» baptary boıynsha aıyp taǵyldy.
Sot úkimimen 10 synyp oqýshysy 6 jyl 8 aıǵa, 11 synyptyń eki oqýshysy 6 jyl 8 aıǵa bas bostandyǵynan aıyryldy. Olar jazasyn kámeletke tolmaǵandardy ustaýǵa arnalǵan qylmystyq atqarý júıesiniń ortasha qaýipsiz mekemesinde óteıdi. Taǵy úsh sottalýshy Qylmystyq kodekstiń 293-baby 2-bóligi 1,3-tarmaqtarymen kináli dep tanylyp, olarǵa 1 jylǵa bas bostandyǵynan shekteý jazasy taǵaıyndaldy.
Qylmystyq kodekstiń 28-baby 3-bóligimen jáne 106-baby 3-bóligimen kózdelgen qylmystyq quqyqbuzýshylyq dáleldenbeı, bul baptar boıynsha úsheýi de aqtaldy. Úsh sottalýshy da – 11 synyp oqýshylary. Olar sot zalynan bosatyldy.
Sot úkimimen azamattyq talap-aryz ishinara qanaǵattandyryldy. Sottalýshylardyń biriniń zańdy ókili jábirlenýshi tarapqa 5 mln teńge moraldyq ótemaqy tóleıdi. Sonymen birge sottalýshylar úlestik tártipte 2 mln teńge ókildiń kómegine ketken shyǵyndy óteýi tıis. Talap aryzdyń bir bóligin talap qoıýshynyń ózderi alyp tastady.
Sotta sýdıa Aqtóbe oblysynyń bilim basqarmasynyń basshysyna jáne Aqtóbe oblystyq polıtsııa departamentiniń bastyǵyna jekeshe qaýly shaǵardy.
Eske salsaq, byltyr Aqtóbeniń Qopa aýylynda janjaldan soń oqýshy kóz jumǵan edi.
Bala quqyqtary jónindegi ýákil Dınara Zakıeva Aqtóbe oblysy Qopa aýylyna baryp, mektepte saýalnama júrgizip, álemjettik bar ekenin anyqtaǵan.
Qylmystyq isti tergeý kezinde eki ret baby aýystyryldy. Qańtarda tergeý aıaqtalyp, is tanysý úshin taraptarǵa berildi.
Bıyl aqpan aıynda oqýshy ólimine qatysty is sotqa tústi.