14 jasqa deıingi balalary bar ákelerdi ákimshilik qamaqqa alý normasy durys pa

ASTANA. KAZINFORM – Konstıtýtsııalyq Sot QR Ákimshilik quqyq buzýshylyq týraly kodeksindegi 50-baptyń 2-bóligin Konstıtýtsııaǵa sáıkestigin tekseredi.

Bul bapqa sáıkes ákimshilik qamaqqa alý 30 táýlikke deıin, al tótenshe nemese soǵys jaǵdaıy kezinde 45 táýlikke deıin taǵaıyndalýy múmkin. Sheshimdi tek sýdıa qabyldaıdy.

- Alaıda zańda 14 jasqa deıingi balalary bar áıelderdi ákimshilik qamaqqa alýǵa tyıym salynǵan. Ótinish berýshiniń pikirinshe, mundaı erekshelik erlerge qatysty ádiletsizdik týdyrady. Óıtkeni 14 jasqa deıingi balalary bar ákelerge ondaı jeńildik qarastyrylmaǵan. Bul – Konstıtýtsııanyń 14-babynda bekitilgen «zań aldynda bári teń» qaǵıdasyna qaıshy bolýy múmkin, - dep jazdy Konstıtýtsııalyq Sottan.

Vedomstvo osy máseleni qarap, normanyń Konstıtýtsııaǵa qanshalyqty sáıkes keletinin anyqtaıdy.

Tekserýdiń barysy men qorytyndysy týraly aqparat Konstıtýtsııalyq Sottyń resmı saıtynda jáne Telegram-arnasynda jarııalanady.

Aıta keteıik, Konstıtýtsııalyq Sot jeke sot oryndaýshylaryna qatysty erejeni qaraýdan bas tartty.