14 jasar qazaqstandyq tennısshi Úndistanda ótken jarystyń absolıýtti chempıony atandy

ASTANA. QazAqparat – Qazaqstandyq Arıana Gogýlına Úndistannyń Gýrgaon qalasynda 18 jasqa deıingiler arasynda ITF Juniors World Tennis Tour serııasynda ótken jarystyń absolıýtti chempıony atandy, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, Mýkkam Ermatov baptaıtyn 14 jasar qazaqstandyq sportshy Úndistanda teńdessiz óner kórsetti.

Astanadaǵy ulttyq tennıs ortalyǵynyń túlegi jekeleı synda fınalda úndistandyq sportshyny utty. Birinshi partııa 6:2 esebimen aıaqtalsa, ekinshisinde qarsylasy básekeni jalǵastyrýdan bas tartty.

Gogýlına fınalǵa deıin 7 oıynda jergilikti tennısshilerdi, sonyń ishinde dodanyń birinshi raketkasyn tize búktirdi.

Juptyq synda sońǵy básekede tek qazaqstandyq tennısshiler bas júldeni sarapqa saldy.

Arıana Albına Kákenovamen birge Sátıma Tóregen - Anastasııa Krymkovadan aılasyn asyrdy – 6:1, 6:2.

Osylaısha, Arıana ITF Juniors jarysynda alǵashqy qos tabysyna qol jetkizdi.

Eske sala keteıik, budan buryn Jibek Qulambaevanyń Astanadaǵy jarystyń fınalyna shyǵa almaǵanyn jazǵan bolatynbyz.