14 jasar aspaz: Óz meıramhanamdy ashqym keledi
Dýlat Almaty qalasynda dúnıege keldi. Úıdiń kenjesi. Aldynda úsh baýyry bar. Qazir №181 orta mekteptiń 8-synybynda oqıdy.
«Osydan úsh jyl buryn ǵalamtordan tanymal aspazdardyń vıdeolaryn kóre bastadym. Ýaqyt óte kele tamaq pisirýge degen qyzyǵýshylyǵym arta tústi. Ásirese, túrik aspazdary Býrak Ózdemır, Nýsret Gókche jáne brıtandyq Gordon Ramsaı meni qatty shabyttandyrdy. Keıin men de vıdeo túsirýdi qolǵa aldym. Bul iste maǵan aǵam Dıas kómektesedi», – deıdi oqýshy bala.
Dýlat 2020 jyly alǵash ret aǵylshyn deserti- traıflǵa tapsyrys aldy. Qazir jas aspaz túrli taǵam daıyndaıdy. Ǵalamtor arqyly retseptilerimen bólisedi. Onyń áleýmettik jelide úlken aýdıtorııasy bar. Búginde Instagram jelisinde 620 myńnan astam jazylýshysy bar.
«Sondaı-aq men meıramhanalarǵa sholý túsiremin, aspazdarǵa kómektesemin. Olardan úırengen dúnıemdi oqyrmandaryma kórsetýge tyrysamyn. Úıde ata-anam, aǵalarym kómektesedi. As úıde kóp tájirbıe jasaımyn. Áleýmettik jelilerge arnalǵan bir vıdeony túsirýge 3-4 saǵat ketedi. Bul ońaı protsess emes. Ol muqııat daıyndyqty qajet etedi. Biz kúnde keshki ýaqytta vıdeo túsiremiz. Bul meniń oqýyma kedergi keltirmeıdi», - deıdi Dýlat.
Aıtýynsha, jas aspaz qazir tapsyrys qabyldamaıdy, qala meıramhanalarymen tyǵyz baılanysta jumys isteıdi. Jarnamadan tabys tabady. Ózin ǵana emes, jaqyndaryn da syılyqtarmen qýantady. Óziniń týǵan kúninde qymbat smartfon satyp aldy. Bul jańalyǵymen ol Instagram – daǵy paraqshasynda bólisti.
«Men áý bastan aqsha tabýdy maqsat etpedim, tek súıikti isimmen aınalystym. Alǵashqy eki jylda tabys túsken joq. Al qazir aqsha jarnamadan túsedi. Eger adam óziniń súıikti isimen jan-tánimen aınalyssa, onyń nátıjesi mindetti túrde bolady. Meniń vıdeolarym birte-birte kóp qaraıtyn boldy. Áleýmettik jelidegi paraqshama jazylǵandar sany artty. Oqyrmandarym jumysymdy joǵary baǵalap, qoldaý kórsetedi. Ol maǵan motıvatsııa beredi. Men blogymdy eki tilde júrgizemin, biraq kóbine orys tilinde, óıtkeni meni basqa elderdiń adamdary da kóredi. Meniń aýdıtorııamnyń 60 paıyzy qazaqstandyqtar, qalǵany sheteldikter», – deıdi ol.
Dýlat tamaq pisirýmen qatar mýzyka men sportty jaqsy kóredi. Ol gıtarada oınap, boks pen aralas jekpe-jekpen shuǵyldanady. Shyǵys taǵamdaryn jaqsy kóredi. Jaqynda ol tanymal aspazdardy kórý úshin Birikken Arab Ámirlikterine bardy.
«Biz jaqynda Dýbaıda boldyq. Túrik aspazdarymen tanysqym keldi, biraq, ókinishke oraı, sáti túspedi. Alaıda, bolashaqta mindetti túrde kezdesemin», - dedi ol.
Qazir ony kóshede adamdar tanyp, birge fotoǵa túsýin suraıdy.
«Iá, kóshede adamdar meni tanyp jatady, birge sýretke túsýimdi suraıdy, men óte rızamyn. Mektepte dostarymnyń bári de meni qoldaıdy, olarmen jaqsy qarym-qatynastamyz, olarmen bala kezden dospyz, sondyqtan tanymaldyqqa asa mán bermeımin», - deıdi jas aspaz.
Dýlat qarapaıym otbasynan shyqqan, anasy medbıke, al ákesi jeke taksı júrgizýshisi. Bolashaqta Almatyda óz meıramhanasyn ashýdy maqsat etip otyr. Ol úshin tájirıbe jınaqtap, aıanbaı eńbek etý kerek.
