14 naýryzdan bastap qarsy alyp jatqan Jańa jylymyz qutty bolsyn - QR Bas prokýrory
ALMATY. 22 naýryz. QazAqparat /Erlik Erjanuly/ - «Biz Ulystyń uly merekesin otbasynda qarsy alýdy dástúrge aınaldyrǵanbyz».
QR Bas prokýrory Qaırat Mámı QazAqparat tilshisine bergen suhbatynda osylaı aıtty.
«Naýryz jyl basy ǵoı. Aq mol bolyp, bereke-birlik bolsyn dep biz bala kezden merekeni naýryz kóje jasap otbasynda qarsy alýdy dástúrge aınaldyrǵanbyz. Onda bir-birimizge tilek tileımiz. Al kóshege shyǵý, qonaqqa barý mindet emes. Ony retine qaraı kóremiz. Men 10 jyl boıy elimizdiń batysynda qyzmet jasadym. Onda meıramdy 14 naýryzdan bastap qarsy alyp, bir-birine jyl qutty bolsyn nemese jas qutty bolsyn dep qaýyshyp jatady. Sondyqtan men búkil qazaqstandyqtarǵa 14 naýryzdan bastap qarsy alyp jatqan Jańa jylymyz qutty bolyp, aq mol bolyp, elimiz aman, turaqtylyǵymyz bekem bolsyn degim keledi», deıdi Qaırat Ábdirazaquly. Onyń aıtýynsha, Ulystyń uly toıynda aq túıeniń qarny jarylyp, barlyq tirshilik ıesi qýanyshqa keneledi. Jasy kishiler úlkenderge sálem berip, bireýge ókpe-renishi bar adamdar Naýryz merekesinde ózara túsinistikke kelip, til tabysyp jatady. Bul Jańa jyldy jaqsy tilekpen qarsy alýǵa jasalǵan eń izgi is-shara.
