14 naýryzda ótetin Senat otyrysynyń kún tártibi bekitildi

ASTANA. KAZINFORM – Senat spıkeri Máýlen Áshimbaevtyń tóraǵalyǵymen ótken Palata Bıýrosynyń otyrysynda depýtattar 14 naýryz kúni bolatyn Senat otyrysynyń kún tártibin bekitti.

Aldaǵy beısenbide senatorlar «1994 jylǵy 9 tamyzdaǵy Qazaqstan Respýblıkasy men Lıtva Respýblıkasynyń arasyndaǵy azamattyq, otbasylyq jáne qylmystyq ister boıynsha quqyqtyq kómek jáne quqyqtyq qatynastar týraly shartqa ózgeris engizý týraly hattamany ratıfıkatsııalaý týraly» zańdy qaraıdy.

Bul zań Eki eldiń azamattyq, otbasylyq, qylmystyq ister boıynsha quqyqtyq kómek jáne quqyqtyq qatynastar týraly shartynyń erejelerin jetildirýdi kózdeıdi.

Sonymen qatar «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań da Palata otyrysynyń kún tártibine shyǵaryldy.

Qujatta medıtsınalyq mamandyqtyń mártebesin arttyrý jáne densaýlyq saqtaý qyzmetkerlerin zańgerlik, qarjylyq qorǵaý jónindegi normalar, sondaı-aq, basqa da sharalar qarastyrylǵan.