14 myńnan 24 myń teńgege deıin: Qazaqstanda bir asym et daıyndaýǵa qansha qajet
ASTANA. KAZINFORM - Qazaqstanda merekelik dastarhannyń bárinde mindetti túrde et bolady. Kazinform agenttiginiń tilshisi ár qala turǵyndary et asýǵa qansha aqsha jumsaıtynyn bildi.
Et - ulttyq taǵam jáne qazaq dastarhanynyń sáni. Et asý kezinde adamdar túrli ádis-tásildi qoldanǵanymen, onyń negizgi quramy eshqashan ózgergen emes. Ol: et, qamyr, pııaz jáne dámdi sorpa.
Máselen, elimizdiń soltústiginde jylqy eti men qazysyn salyp, oǵan kartop qosqandy unatady. Al elimizdiń batysynda et ornyna balyq qoldanyp, fıshbarmaq dep ataıdy. Ońtústik óńirlerde et asqan kezde tuzdyqqa pııaz qosyp qana qoımaı, sábiz ben kartopty qosa pisiredi. Shyǵys Qazaqstanda qazdyń nemese basqa úı qustarynyń etin de qosady. ıAǵnı adamdar etke óz qalaýynsha kókónis qosady.
Biri tek jylqy etin jese, taǵy biri ettiń birneshe túrin qatar asady. Qamyryn juqa etip jaısa, keıbiri qalyń bolǵanyn qalaıdy. Kóbi jylqy eti men qazy asqandy jón kóredi.
Et asý asa qıyn emes. Eń qymbaty - et. Shyǵyn da tek et baǵasyna qaraı ózgeredi. Oǵan qazy men súr et qossa shyǵyn da ósedi. Sonymen birge shyǵyn qansha adamdy qonaqqa shaqyrǵanyńyzǵa qaraı ózgere beredi.
Ulttyq taǵamdy 6-8 adamǵa arnap daıyndaý úshin jylqy etin, súr et, qazy qosamyz.
Ulttyq taǵamnyń quramy:
- Qazy - 1 dana (shamamen 1–1,2 kg)
- jylqy eti — 1,5 kg
- jylqynyń súr eti — 1 kg
- un — 1 kg
- jumyrtqa — 3-4 dana.
- pııaz — 4–5 dana
- sý - 5–6 lıtr
- tuz — 1 as qasyq jáne qara burysh.
Sonymen birge qazir etke kartop qosady. Shamamen 1 keli kartop jetkilikti.
Eger qajetti azyq-túlik ónimderiniń ár óńirdegi baǵasyn eseptep qossaq, et asýǵa ketetin shyǵynnyń orta esebi shyǵady. Eń tómen shyǵyn Almaty qalasynda anyqtaldy. Munda et asýǵa kem degende 14 011 teńge jumsaıdy. Qyzylordada — 14 155 teńge jáne Semeıde
— 14 566 teńge. Sebebi bul qalalarda jylqy eti, sút et jáne qazy baǵasy ózgege qaraǵanda tómen. Máselen Almatyda balǵyn jylqy etiniń baǵasy - 3 399 tg/kg, sút et — 5 000 tg/kg, qazy — 4 500 tg/kg jáne odan joǵary. Qyzylordada jylqy etiniń baǵasy — 3 400 tg/kg, súr et — 4 200 tg/kg jáne qazy — 4 100 tg/kg. Semeıde balǵyn jylqy etiniń baǵasy 2 600 tg/kg, súr et men qazy — 5 000 tg/kg.
Óskemende et asýǵa kem degende 15 330 tg, Astanada 15 369 tg, Aqtaýda 15 418 tg, Atyraýda 15 679 tg jáne Taldyqorǵanda 15 814 tg kerek. Bul qalalarda jylqy etiniń kelisi 3 500 teńgeden bastalyp, 4 000 teńgege jetedi. Al súr et pen qazynyń kelisi shamamen 5 000 tenge bolady. Taldyqorǵanda baǵa sál ózgeshe. Jylqy etiniń baǵasy 3 500 — 4 500 tg, qazy — 3 500 tg jáne súr et — 6 500 tg.
Elimiz boıynsha 6-8 adamǵa arnap et asý baǵasy Qaraǵandy (16 302 tg), Jezqazǵan (16 550 tg), Túrkistan (16 555 tg), Petropavl (16 700 tg), Pavlodar (17 252 tg) men Oralda (17 920 tg) shamamen 16 000 — 17 000 teńge aralyǵynda bolady. Al Aqtóbe (19 024 tg) men Kókshetaýda (19 122 tg) shamamen 20 000 tg jumsalady. Kókshetaýda jylqy etiniń baǵasy 3800 teńge bolǵanymen súr etti 7500 teńgege satyp alady.
Tarazda et asýǵa shamamen 21 052 teńge qajet. Munda jylqy etiniń kelisi 4 800-5 500 tg, qazy 5 500-6 000 tg, al súr et 7500 tg. Qostanaılyqtar 6-8 adamǵa arnap et assa 22 672 teńge qajet. Munda qazynyń kelisi 9 000 teńgege deıin barady. Al et asý shymkenttikterge qymbatqa túsedi. Shamamen 24 135 teńge qajet. Munda jylqy etiniń eń tómen baǵasy 5 500 teńge bolyp tur.
Buǵan deıin qazaqstandyqtardyń qııar men qyzanaq tuzdaýǵa qansha jumsaıtyny týraly jazyldy.
