14 kún karantınde jatqan Almatynyń bas sanıtar dárigeri ózine taǵylǵan aıypty negizsiz dedi

ALMATY. QazAqparat - Almaty qalalyq taýarlar men qyzmetterdiń sapasy men qaýipsizdigin baqylaý departamenti basshysy Aızat Moldaqasymova onlaın brıfıng barysynda koronavırýs ınfektsııasyna qatysty epıdemıologııalyq ahýal týraly aqparat taratty, dep habarlaıdy QazAqparat tilshisi.

Departament basshysy Germanııadan kelgen tranzıttik reıste koronavırýs juqpasy tabylǵan adammen birge kelgendikten 14 kún karantınde jatqan bolatyn.

Keıin Almaty qoǵamdyq keńesi Aızat Moldaqasymova der kezinde oqshaýlanbaı, jumys babymen kóp adammen aralasyp, adamdardyń densaýlyǵyn qaterge tikti degen aıyp taqqan edi.

Brıfıng barysynda jýrnalıster osy saýaldy qoıdy.

«Men ózime qatysty aıyptaýlardy negizsiz dep sanaımyn. Men 14 kún karantınnen shyqtym. Osy ýaqyt aralyǵynda 2 ret test tapsyrdym. Nátıjesi mende vırýs joqtyǵyn kórsetti. Birinshiden, men Germanııada bolǵan joqpyn. Men tek 1,5 saǵat tranzıttik zonada boldym. 10 naýryzda Germanııa 2-shi sanatqa jatatyn. Sol sebepti Germanııadan kelgen adamdar tek telefon arqyly baqylaýda bolatyn. 13 naýryzda nege birden oqshaýlanbady degen suraq boldy. Men ózim túski 15.00-de ınfektsııa juqtyrǵan jolaýshymen birge kelgenimdi bildim. Estigen ýaqytta birden statsıonarǵa oqshaýlanyp, test tapsyrdym. Barlyǵy ınfektsııa joqtyǵyn kórsetti. 14 naýryzda meni emdeýshi dárigerim úıge shyǵardy. Qazir densaýlyǵym jaqsy»,- dedi Aızat Moldaqasymova.