14 qazan kúni Astanada TMD memleketteriniń basshylary kezdesedi

ASTANA. QazAqparat – Qazaqstan Respýblıkasynyń Táýelsiz Memleketter Dostastyǵyndaǵy tóraǵalyǵy sheńberinde 14 qazan kúni elordada Memleket basshysy Qasym-Jomart Toqaevtyń basshylyǵymen TMD memleketteri basshylarynyń sammıti ótedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«TMD memleketter basshylarynyń keńesi – dostastyqtyń joǵary organy, onda uıym qyzmetiniń negizgi máseleleri talqylanady jáne sheshiledi. TMD sammıti Qazaqstannyń osy uıymǵa tóraǵalyq etýi aıasyndaǵy basty oqıǵalardyń biri bolmaq. Bul mańyzdy sharaǵa pandemııadan keıingi kezeńde alǵash ret oflaın rejımde TMD quramyndaǵy búkil memleketterdiń basshylary qatysady», - dedi Aıbek Smadııarov mınıstrlikte ótken brıfıngte.

Bul sharaǵa Ázerbaıjan, Armenııa, Belarýs, Qyrǵyzstan, Reseı, Túrikmenstan, Tájikstan, Ózbekstan basshylary, sondaı-aq atqarý komıtetiniń tóraǵasy – TMD atqarýshy hatshysy qatysady dep kútilip otyr.

Sammıtte sońǵy jyldary TMD jelisi boıynsha is-sharalarǵa qatysýdy toqtatqan Ýkraına ókili bolmaıdy.

Sondaı-aq, Moldova basshysy jumys kestesiniń tyǵyzdyǵyna baılanysty qatysa almaıdy.

«Іs-shara barysynda dostastyq alańyndaǵy ózara is-qımyldyń ózekti máselelerin talqylaý, saýda-ekonomıkalyq, mádenı-gýmanıtarlyq salalardaǵy, sondaı-aq qaýipsizdik salasyndaǵy ıntegratsııalyq baılanystardy odan ári damytýǵa jáne nyǵaıtýǵa baǵyttalǵan birqatar qujattardy qaraý jáne qabyldaý josparlanýda. Atap aıtqanda, qaýipsizdik salasyndaǵy ózara is-qımyldy odan ári nyǵaıtý maqsatynda memleket basshylary 2023-2025 jyldarǵa arnalǵan terrorızm men ekstremızmge qarsy kúrestegi yntymaqtastyqtyń kezekti baǵdarlamasyn bekitedi», - dedi A. Smadııarov.

Integratsııalyq ózara is-qımyldaǵy mádenı quramdas bóliktiń erekshe róli turǵysynan memleket basshylary Qazaqstan bastamasy boıynsha mádenıet salasyndaǵy yntymaqtastyqty damytý týraly málimdeme qabyldaýdy josparlap otyr.

Sondaı-aq, saılaý organdarynyń jelisi, sybaılas jemqorlyqqa qarsy is-qımyl máseleleri boıynsha ózara is-qımyldy kózdeıtin birqatar halyqaralyq sharttarǵa qol qoıylady.

«Sonymen qatar, sammıtte 2023 jyly TMD-ǵa tóraǵalyq etýdi Qyrǵyz Respýblıkasyna tapsyrý jáne Bishkek qalasynda memleket basshylary keńesiniń kezekti otyrysyn ótkizý týraly sheshim qabyldaý josparlanýda. Memleket basshysy elimizdiń TMD-ǵa tóraǵalyǵyn qorytyndylaıdy dep kútilýde», - dedi resmı ókil.