14 qarashadan bastap Pavlodarda blok beketterden pvlinfo.kz saıtyna tirkelgender ǵana óte alady
PAVLODAR. QazAqparat - 9 qarashadan beri oblys ortalyǵyndaǵy blok beketter arqyly 56 myńnan astam kólik kirip-shyqqan, dep habarlaıdy QazAqparat Pavlodarnews.kz saıtyna silteme jasap.
Bul týraly onlaın baspasóz jıynynda Pavlodar qalasynyń ákimi Erjan Imanslıam málim etti.
- Bas sanıtarlyq dárigerdiń qaýlysyna sáıkes 9 qarashadan qalaǵa kireberisterde 5 blok beket ornatylǵan bolatyn. Osyǵan deıin beketterden jumys ornynan alǵan anyqtamalar arqyly ótkizip kelgen bolsa, erteńnen bastap pvlinfo.kz saıty arqyly tekserip ótkizedi. Búginde saıtqa jeke jáne zańdy tulǵalardan 15 myńnan astam ótinish kelip tústi, - dedi Erjan Imanslıam.
Qala ákiminiń aıtýynsha, sońǵy táýlikte blok beketterden 12236 kólik kirip-shyqqan bolsa, 210 kólik keri qaıtarylǵan. Al, 9 qarashadan beri beketter arqyly 56 myńnan astamy kirip-shyqqan.
Sondaı-aq shahar basshysy karantındik shekteýlerge qatysty barlyq suraqtar boıynsha 109 baılanys nómirine habarlasýǵa bolatynyn atap ótti. Búginde 109 ortalyǵyna táýligine 2 myńnan astam qońyraý túsýde.
Aıta keteıik, Pavlodar qalasynda koronavırýs juqtyrǵandar sany 3327-ge jetti. Ótken táýlikte 43 adamnan KVI anyqtaldy. Onyń ishinde 22 naýqas buryn KVI juqtyrǵandarmen baılanysta bolǵandar. Oǵan qosa, 43 adamnyń ishinde 10-y – bala, altaýy – 60 jastan asqan turǵyndar. Barlyq naýqastarmen baılanysta bolǵan 148 adam anyqtaldy. Qazirgi ýaqytta qalada indettiń ósimi 1,3 paıyzdy quraıdy.
