14 qarashada elimizdegi qandaı joldar jabyq tur
ALMATY. KAZINFORM — «QazAvtoJol» ulttyq kompanııasy elimizdegi avtojoldardaǵy qazirgi jaǵdaı týraly málimetti jarııalady.
Ulttyq kompanııanyń dereginshe, Abaı oblysynda 2025 jylǵy 14 qarasha saǵat 07:30–da respýblıkalyq mańyzy bar «Almaty — Taldyqorǵan — Óskemen — Shemonaıha — RF shekarasy» avtojolynyń 778-960-shaqyrym aralyǵyndaǵy (Aıagóz qalasy — Janaózen aýyly) ýchaskesinde kóliktiń barlyq túri úshin qozǵalys ashyldy.
Al eki óńirde shekteýler áli de kúshinde.
Soltústik Qazaqstan oblysy
9 qarasha kúni saǵat 11:00–de qolaısyz aýa raıyna (jaýyn-shashyn, aýyr júk kólikteriniń kóptigi) baılanysty «Tımırıazevo — Sarykól — oblys shekarasy» avtojolynyń 0-30-shaqyrymynda, ıaǵnı Qostanaı oblysy shekarasy — Tımırıazevo aýyly ýchaskesinde barlyq avtokólik túri úshin qozǵalysqa shekteý engizildi.
Shyǵys Qazaqstan oblysy
5 qarashadan bastap tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.
Bul shara taýly jerde jol qaýipsizdigin qamtamasyz etý maqsatynda qabyldanyp, qys maýsymy aıaqtalǵanǵa deıin kúshinde bolady.
Aýa raıy
Abaı, Pavlodar jáne Shyǵys Qazaqstan oblystarynda qar aralas jańbyr men qar jaýady.
— Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, — delingen habarlamada.
Eske salaıyq, sınoptıkter 4 qarashada elimizdiń basym bóliginde tuman túsip, kóktaıǵaq bolatynyn eskertken edi.