14 qańtarda saılanǵan Senat depýtattaryna kýálik tabys etildi

ASTANA. QazAqparat – 14 qańtarda ótken kezekten tys Senat saılaýynyń jeńimpazdary resmı túrde depýtat atandy, dep habarlaıdy QazAqparat tilshisi.

«Ortalyq saılaý komıssııasy tirkegen sátten bastap sizderdiń QR Senaty depýtaty retindegi ókiletterińiz bastaldy. Sizder elimizdiń zań shyǵarý bıligin júzege asyratyn eń joǵary ókildi organy QR Parlamenti depýtattary boldyńyzdar. Sonymen qatar 19 naýryzǵa taǵaıyndalǵan kezekten tys Májilis jáne máslıhat depýtattary saılaýyna baılanysty jańa quram saılanǵanǵa deıin sizder Senat depýtattary retinde Konstıtýtsııalyq zańdardy qabyldaý boıynsha mindetterdi oryndaısyzdar. Sizderge sáttilik tileımin», – dedi Ortalyq saılaý komıssııasynyń tóraǵasy Nurlan Ábdirov.

OSK tóraǵasy 20 Senat depýtaty jáne qaıta taǵaıyndalǵan halyq qalaýlysy Andreı Lýkınge depýtattyq kýálik tabys etip, tósbelgi taqty.

Eske salsaq, 14 qańtarda kezekten tys Senat depýtattarynyń saılaýy ótken edi. Saıası naýqan nátıjesinde 20 óńirden bir-birden depýtat saılandy.

Odan bólek, depýtattyq ókilettigi toqtatylǵan Andreı Lýkın qaıta senator bolyp saılandy.

Buǵan deıin Ortalyq saılaý komıssııasy Memleket basshysynyń qaýlysymen taǵaıyndalǵan 10 senatordy tirkegeni týraly habarlaǵan edik.