14 qańtar. Týǵan kún ıeleri
ESІMDER
115 jyl buryn (1904-1973) qazaqtyń áıgili keskindemeshisi, grafık-sýretshi, qazaq beıneleý óneriniń negizin salýshylardyń biri, Qazaq KSR-iniń halyq sýretshisi, Qazaq KSR-iniń eńbek sińirgen óner qaıratkeri, Sh.Ýálıhanov atyndaǵy Memlekettik syılyqtyń laýreaty Ábilhan QASTEEV dúnıege keldi.
Almaty oblysynyń Jarkent aýdanynda týǵan. Almaty qalasynda jáne Máskeý qalasynda kórkemsýret stýdııasynda oqydy. 1954-1956 jyldary Qazaq KSR Sýretshiler odaǵy basqarmasynyń tóraǵasy qyzmetin atqardy. Onyń alǵashqy kórmege qoıylǵan týyndylary - «Tigin ústinde», «Mektepke», «Avtoportret», «Kógildir kóılekti qyz», «Qaryndasymnyń portreti». Sýretshiniń «Ǵ.Muratbaev», «A.Qunanbaev», «J.Jabaev», «A.Imanov», «K.Ázirbaev» sııaqty portrettik týyndylary joǵary tanym-talǵamnyń úlgisi. Tarıhı taqyryptaǵy «Túrksib», «Amangeldi sarbazdary», «Kolhoz toıy», «Qalyńdyq», t.b. kórkem týyndylarynan Qasteev qalamyna tán qasıet - epıkalyq aýqymdylyq, ulttyq boıaýdyń aıqyndyǵy kórinedi. Sýretshi halqymyzdyń turmys-tirshiligin dál beınelep, ulttyq dúnıetanym aıasynda tyń kompozıtsııalyq sheshim taba bildi. Onyń «Kıiz úıdiń ishki kórinisi», «Qyz Jibek», «Qyz uzatý», «Qos qurby», «Kelin túsirý» taǵy basqa shyǵarmalary ulttyq qazynamyzǵa aınaldy. Sýretker Qasteev qazaq halqynyń salt-dástúriniń ozyǵy men tozyǵyn ajyratyp, kertartpa kemshilikterdi ashyna beıneledi. Mysaly, «Kedeı men baı qudyq basynda», «Qurǵaqshylyq kezinde moldanyń jylý jınaýy», «Qyz alyp qashý» shyǵarmalary osynyń dáleli. Onyń ultyna, týǵan jerge, otanyna súıispenshiligi shyǵarmalarynda shynaıy kórinis tapty. Qylqalam sheberi sýret órnekteriniń syrly boıaýyn, utymdy qoldanyp, beıneleý ónerinde mádenıet tarıhynyń, respýblıkalyq qoǵamdyq ómirdiń jylnamasyn jasady. Abaı men Qasteev arasyndaǵy názik baılanys dúnıeni estetıkalyq-kórkemdik turǵydan tanýdyń, óner ózektestiginiń, rýhanı sabaqtastyqtyń kórinisi. Abaı tulǵasy Qasteevtiń súıikti keıipkeri boldy. Ol Abaıdyń kelbetin ár qyrynan somdady. Sýretshiniń qylqalamynan týyndaǵan «Abaı kıiz úı aldynda», «Jas Abaı», «Abaı jaz jaılaýda» jáne «Búrkitshi», «Qys», «Jaz», «Kóktem» atty shyǵarmalary osyǵan dálel. Shymkent qalasyndaǵy óner ýchılışesi, Qazaqstan Respýblıkasy Memlekettik óner murajaıy Qasteevtiń atymen atalady. «Qazan tóńkerisi», 2 márte «Eńbek Qyzyl Tý», «Qurmet Belgisi» ordenderimen marapattalǵan.
58 jyl buryn (1961) Soltústik Qazaqstan oblysy ákimdiginiń Tabıǵı resýrstar jáne tabıǵatty paıdalanýdy retteý basqarmasynyń basshysy Qabıden Qaıyrbekuly SÁDÝAQASOV dúnıege kelgen.
Qazirgi Aqmola oblysynda týǵan. 1983 jyly tselınograd aýyl sharýashylyq ınstıtýtyn zootehnık mamandyǵy boıynsha, 2002 jyly Qazaq gýmanıtarlyq-zań ýnıversıtetin zańger mamandyǵy boıynsha tamamdady.
Eńbek joly: 1983 jyly Tselınograd oblysy Makın aýdany «Sývorov» sovhozynda zootehnık laýazymynda bastady. «Sývorov» sovhozynyń komsomol komıtetiniń hatshysy, odan ári Tselınograd oblysy Makındegi Qazaqstan LJOK ІІ hatshysy jáne І hatshysy bolyp jumys istedi (1984-1990); Tselınograd oblysy Makın aýdany «Ergol» sovhozynyń bas zootehnıgi (1990-1993); Makın aýdandyq aýyl sharýashylyǵy basqarmasynyń bas mamany (1993-1994); Makın aýdany ákimi apparatynda tilder jónindegi bólimniń meńgerýshisi, aýdandyq komıtettiń ulttyq saıasat jónindegi meńgerýshisi, ishki saıasat jáne áleýmettik sala sektorynyń meńgerýshisi (1994-1997); kásipkerlikpen qyzmette (1997-2008); «Nur Otan» HDP qalalyq fılıalynda tóraǵanyń birinshi orynbasary (2008-2009); Soltústik Qazaqstan oblysy ákimdiginiń «Astana» KMK dırektory (2009-2011). Soltústik Qazaqstan oblystyq bilim basqarmasynda bas maman (2011).
Qazirgi laýazymyn 2011 jyldyń tamyzynan beri atqaryp keledi.
55 jyl buryn (1964) Shymkent qalalyq sotynyń tóraǵasy Erbol Muhajanuly RAHYMBEKOV dúnıege keldi.
1989 jyly Qaraǵandy memlekettik ýnıversıtetin támamdap, zańger mamandyǵyna ıe boldy. Sot júıesinde 1991 jyldan bastap halyqtyq sýdıanyń mindetin atqarýshy, halyqtyq sýdıa, sýdıa bolyp qyzmet atqardy. Qazaqstan Respýblıkasy Prezıdentiniń 1996 jylǵy 15 qarashadaǵy Jarlyǵymen Qaraǵandy oblysynyń Nura aýdandyq sotynyń tóraǵasy qyzmetine taǵaıyndaldy. 2000-2010 jyldar aralyǵynda Qaraǵandy oblysynyń Oktıabr aýdandyq sotynyń quramyndaǵy Kırov sot ýchaskesiniń aǵa sýdıasy, Oktıabr aýdanynyń № 3 aýdandyq sotynyń sýdıasy, Oktıabr aýdanynyń № 3 aýdandyq sotynyń tóraǵasy, Temirtaý qalalyq sotynyń tóraǵasy, Qaraǵandy qalasynyń Qazybek bı aýdandyq sotynyń tóraǵasy laýazymdarynda qyzmet etti. Qazaqstan Respýblıkasy Prezıdentiniń 2010 jylǵy 9 qarashadaǵy Jarlyǵymen Soltústik Qazaqstan oblystyq sotynyń apellıatsııalyq sot alqasynyń tóraǵasy qyzmetine taǵaıyndaldy. Qazaqstan Respýblıkasy Prezıdentiniń 2012 jylǵy 2 shildedegi Jarlyǵymen qylmystyq ister jónindegi apellıatsııalyq sot alqasynyń tóraǵasy qyzmetine taǵaıyndaldy. Qazaqstan Respýblıkasy Prezıdentiniń 2014 jylǵy 17 maýsymdaǵy Jarlyǵymen Astana qalasynyń qylmystyq ister jónindegi mamandandyrylǵan aýdanaralyq sotynyń tóraǵasy qyzmetine taǵaıyndaldy. Qazaqstan Respýblıkasy Joǵarǵy sotynyń sýdıasy (2015 jyldan); QR Joǵarǵy Sotynyń BAQ-pen yntymaqtastyq jónindegi úılestirýshi sýdıasy (2016-2018).
Qazirgi laýazymyna 2018 jyldyń qazan aıynda taǵaıyndaldy.
51 jyl buryn (1968) Shyǵys Qazaqstan oblysy jumyspen qamtý jáne áleýmettik baǵdarlamalardy úılestirý basqarmasynyń basshysy Elena Vasılevna STARENKOVA dúnıege kelgen.
Semeı qalasynda týǵan. Qaraǵandy memlekettik ýnıversıtetin orys tili jáne ádebıet mamandyǵy boıynsha bitirgen (1990).
Eńbek joly: Semeı qalasyndaǵy № 2 orta mekteptiń orys tili jáne ádebıeti pániniń muǵalimi (1992-1994); Kýrchatov qalasyndaǵy № 2 mektep-lıtseı dırektorynyń tárbıe jumystary jónindegi orynbasary (1994-2000); Jeke eńbek sharty boıynsha Kýrchatov qalasy ákiminiń áleýmettik máseleler boıynsha orynbasary (10.2001-12.2001); ShQO «Kýrchatov qalasy ákimi apparaty» memlekettik mekemesiniń ishki saıasat jáne áleýmettik sala bóliminiń basshysy (2001-2004); Kýrchatov qalasy ákimi apparatynyń basshysy (04.2004-11.2004); Shyǵys Qazaqstan oblysy Kýrchatov qalasy ákiminiń orynbasary (2004-2016).
Qazirgi laýazymyna 2016 jyly taǵaıyndaldy.
42 jyl buryn (1977) Atyraý oblysy ákiminiń orynbasary Nursáýle Saılaýqyzy SAILAÝOVA dúnıege kelgen.
Atyraý oblysynda týǵan. Qazaq qyzdar memlekettik pedagogıkalyq ınstıtýtyn bitirgen, psıholog (1997); "Bolashaq" halyqaralyq bilim berý baǵdarlamasynyń stıpendıaty (2004).
Eńbek jolyn 1997 jyly Qazaq memlekettik qyzdar pedagogıkalyq ýnıversıtetinde aspırant bolyp bastaǵan. Almaty qalasyndaǵy 167 mektepte psıholog boldy (2001-2002). Qazaq memlekettik pedagogıkalyq ýnıversıtetinde túrli laýazymdar atqardy (2002-2008); H.Dosmuhamedov atyndaǵy Atyraý memlekettik ýnıversıtetiniń pedagogıka, psıhologııa jəne óner fakýltetiniń dekany (2008-2012); Jastar ortalyǵynyń dırektory (2012-2013); mektepke deıingi jəne bastaýysh bilim berý kafedrasynyń dotsenti (2013-2014); Atyraý qalalyq bilim berý bóliminiń basshysy (2014-2015); Atyraý oblystyq bilim berý basqarmasynyń basshysy (2015-2017 ).
Qazirgi qyzmetin 2017 jyldyń jeltoqsan aıynan beri atqaryp keledi.
35 jyl buryn (1984) «Qazaqstannyń ınvestıtsııalyq qory» AQ basqarma tóraǵasy Ermek Rahatuly SÁKІShEV dúnıege kelgen.
Qazaq Memlekettik Quqyq ýnıversıtetin, Qazaq menedjment, ekonomıka jáne boljaý ınstıýtyn bitirgen.
Eńbek jolyn 2005 jyly Ekonomıka jáne bıýdjettik josparlaý mınıstrliginde jetekshi maman laýazymynan bastaǵan; jeke sektor kompanııalarynda qyzmette (2005-2007), Qazaqstan Respýblıkasy Prezıdentiniń Ákimshiliginde sarapshydan bastap áleýmettik-ekonomıkalyq monıtorıng sektorynyń meńgerýshisine deıingi satylarda qyzmet etken (2008-2011); «Samuryq-Qazyna» UÁQ» AQ-da ınnovatsııalyq saıasat departamentiniń dırektory (2011-2012); jeke sektor kompanııalarynda basshylyq laýazymdaryn atqarǵan (2012-2014); «Baıterek development» AQ basqarma tóraǵasynyń orynbasary (2015 jyldan).