14 el jáne halyqaralyq uıymdar Izraıldegi AQSh elshisiniń málimdemesin aıyptady
ASTANA. KAZINFORM — Túrkııa, Mysyr, Iordanııa, Lıvan, Indonezııa, Kýveıt, Katar, Oman, Pákistan, Bahreın, Saýd Arabııasy, Sırııa, Palestına jáne Birikken Arab Ámirlikteriniń syrtqy ister mınıstrleri, sondaı-aq Islam yntymaqtastyǵy uıymy, Arab memleketteri lıgasy jáne Parsy shyǵanaǵy arab memleketteri yntymaqtastyq keńesiniń hatshylyqtary AQSh-tyń Izraıldegi elshisi Maık Hakabıdiń málimdemesin aıyptaıtyn birlesken úndeý jarııalady. Bul týraly Anadolý agenttigi jazdy.
Málimdemede Hakabıdiń Izraıldiń búkil Taıaý Shyǵysqa baqylaý ornatýy «qabyldaýǵa bolatyn» jaǵdaı degen sózi synǵa alynǵan. Birlesken málimdemeni jeksenbi, 22 aqpanda Túrkııanyń syrtqy ister mınıstrligi jarııalady.
Qujatta Hakabıdiń málimdemesi halyqaralyq quqyq pen BUU Jarǵysyn óreskel buzý bolyp sanalatyny, sondaı-aq aımaqtyń qaýipsizdigi men turaqtylyǵyna eleýli qater tóndiretini aıtylǵan. Sondaı-aq bul pikirler AQSh prezıdenti Donald Tramptyń Gaza sektoryndaǵy shabýyldardy toqtatýǵa baǵyttalǵan keshendi josparynda kórsetilgen ustanymǵa tikeleı qaıshy keletini atap ótildi.
Málimdemede bul jospar shıelenisti ýshyqtyrýdyń aldyn alýǵa jáne Palestına halqyna táýelsiz memleket qurýǵa múmkindik beretin saıası perspektıva qalyptastyrýǵa negizdelgeni aıtylǵan.
«Mınıstrlikter jospar tózimdilik pen beıbit qatar ómir súrý qaǵıdattaryna negizdelgenin atap ótedi jáne ózge aýmaqtardy baqylaýdy aqtaýǵa baǵyttalǵan málimdemeler bul maqsattarǵa qaıshy kelip, shıelenisti kúsheıtetinin ári arandatýshylyq sıpatta ekenin málimdeıdi», delingen qujatta.
Sondaı-aq Izraıldiń basyp alynǵan palestınalyq nemese basqa da arab aýmaqtaryna qatysty eshqandaı egemendik quqyǵy joq ekeni erekshe atap ótildi.
«Mınıstrler men bas hatshylar Batys jaǵalaýdy anneksııalaý nemese Gaza sektoryn bólý áreketterine túbegeıli qarsy, basyp alynǵan palestınalyq aýmaqtardaǵy qonystandyrý saıasatynyń keńeıýine narazylyq bildiremiz jáne arab memleketteriniń egemendigine tóngen kez kelgen qaýip-qaterdi úzildi-kesildi qabyldamaımyz», dep málimdedi mınıstrler men bas hatshylar.
Qujatta Izraıldiń ekspansıonıstik saıasat pen zańsyz áreketterin jalǵastyrýy aımaqtaǵy zorlyq-zombylyq pen qaqtyǵystardy kúsheıtip, beıbitshilikke qol jetkizý perspektıvalaryn álsiretetini aıtylǵan. Sondaı-aq Palestına halqynyń 1967 jylǵy 4 maýsymdaǵy shekaralar negizinde táýelsiz memleket qurý jáne ózin-ózi anyqtaý quqyǵy qaıta rastaldy. Málimdemede eki memleket qaǵıdatyna nuqsan keltiretin arandatýshylyq málimdemeler men sharalardy dereý toqtatýǵa shaqyrý jasalǵan.
Buǵan deıin AQSh-tyń Izraıldegi elshisi Maık Hakabı Taker Karlsonǵa bergen suhbatynda Izraıldiń «Nilden Evfratqa deıingi» aýmaqqa «bıblııalyq quqyǵy bar» ekenin aıtyp, «olardyń bárin alyp qoıǵany keremet bolar edi» degen pikir bildirgen.
Dıplomatııalyq mıssııa basshysy bul jerler teologııalyq turǵyda Izraılge «tıesili» ekenin, jaqyn bolashaqta bul aýmaqtarǵa tolyq egemendik ornatý kútilmeıtinin, biraq «teologııalyq jáne tarıhı turǵyda bul Qudaı ýáde etken jerler» ekenin aıtqan.
Eske sala ketsek, jýyrda AQSh Taıaý Shyǵysta 2003 jyldan bergi eń iri avıatsııalyq kúshin shoǵyrlandyrdy.