14 aqyly ýchaskede tólemaqy ýaqytsha qalaı qaıta esepteledi

ASTANA. KAZINFORM – 29 qańtardan bastap respýblıkalyq mańyzy bar 14 aqyly jol ýchaskesinde tólemaqy esepteý tártibi jańardy. 

Endi jolda aqaýy anyqtalǵan bólikter ýaqytsha túrde aqyly qashyqtyqtan alynyp tastalady.

Sonyń nátıjesinde júrgizýshi tóleıtin soma tómendeıdi.

— Aqy tek talapqa saı, qaýipsiz jol bóligi úshin ǵana alynady. Al aqaýy bar tustar tolyq qalpyna keltirilgenge deıin tarıfke kirmeıdi, — delingen QazAvtoJol habarlamasynda.

Júrgizýshige qalaı áser etedi?

Joldyń ózi aqyly bolyp qala beredi, biraq tólem mólsheri azdaý esepteledi.

— Eshqaıda baryp, ótinish jazýdyń qajeti joq. Tólem júıesi bárin avtomatty túrde júrgizedi, aqaýy bar bólikterdi ózi esepten shyǵaryp, tólemdi jańasha shyǵarady, — delingen habarlamada.

Demek júrgizýshi burynǵydan az tóleıdi.

Mysaly úshin Astana — Temirtaý baǵytynda jeńil kólik buryn 410 teńge tóleıtin. Aqaýly bólikter ýaqytsha esepten alynǵannan keıin tólem 360 teńge bolady. Júrgizýshi joldyń «qalypty», talapqa saı bóligi úshin ǵana tóleıdi.

— Tarıfti osylaısha ýaqytsha ózgertý aqaýlar tolyq joıylǵanǵa deıin saqtalady. Al aqaýlardy jóndeý jumystary bıyl jol-qurylys maýsymy bastalysymen qolǵa alynady. Budan bólek, joldyń jaı-kúıi únemi baqylaýda bolady aqaý baıqalsa, der kezinde anyqtap, joıýǵa múmkindik jasalady, — delingen vedomstvo habarlamasynda.

Tólem mólsherlemeleri qaıta esepteletin 14 ýchaske:

1. Kókshetaý — Petropavl
2. Pavlodar — Semeı — Qalbataý
3. Pavlodar — Omby
4. Astana — Temirtaý
5. Almaty — Qonaev
6. Qonaev — Taldyqorǵan
7. Shymkent — Qyzylorda
8. Oral — Samara
9. Oral — Saratov
10. Astana — Pavlodar
11. Qyzylorda — Aral
12. Aqtóbe — Orynbor
13. Qostanaı — Troıtsk
14. Taraz — Qaınar

Aıta ketelik bıyl aqyly avtojoldardan 72 mlrd teńge túsken.