14,5 mlrd teńge jymqyrǵan Qaırat Boranbaevqa qatysty isti tergeý aıaqtaldy

ASTANA. QazAqparat – QR Qarjy monıtorıngi agenttigi asa iri kólemde memleket qarjysyn jymqyrdy jáne aqshany jylystatty degen kúdikke ilingen Qaırat Boranbaev pen onyń sybaılastarynaqatysty istiń tergeýin aıaqtady, dep habarlaıdy QazAqparat.

«QR Qarjy monıtorıngi agenttigi asa iri kólemde memleket qarjysyn jymqyrdy jáne aqshany jylystatty degen kúdikke ilingen Qaırat Boranbaev pen onyń senimdi adamy Nahanovqa, «QazMunaıGaz» UK» AQ Basqarýshy dırektory Ibýlla Serdi jáne «QazaqGaz» UK» AQ Basqarma tóraǵasynyń orynbasary Januzaq Taıyrǵaqatysty istiń tergeýin aıaqtady.

Olar 2019 jyly baqylaýdaǵy «Azııagaz Chýndja» JShS arqyly gazdy jetkizý kezinde Qazaq Gaz (burynǵy QazTransGaz) ulttyq kompanııasynyń qarajatyn jymqyrýdyń qylmystyq shemasyn júzege asyrǵan.

Urlanǵan 14,5 mlrd teńge kólemindegi qarajat keıinnen zańdy kásipkerlik qyzmetten dıvıdend retinde bólý jáne tóleý jeleýimen zańdastyrylǵan.

Osylaısha, kúdiktiler jasalǵan zańsyz operatsııalardyń shyn mánin jasyrǵan. Tergeý barysynda keltirilgen shyǵyn tolyq kólemde óteldi. Sonymen qatar, 38 mıllıard teńge qolma-qol aqsha men 4,2 mıllıard teńgeniń jyljymaıtyn múlikteri tárkilendi. Osy bólim boıynsha tergeý aıaqtaldy, materıaldar protseske qatysýshylarǵa tanystyrý úshin berildi», - delingen usynylǵan habarlamada.

Budan bólek, málim etilgendeı, Avstrııa, Latvııa, Lıýksembýrg, Moldova, Tájikstan, Birikken Arab Ámirlikteri jáne Estonııadan zań aıasyndaǵy kómeginiń nátıjesi kelmegendikten, Boranbaevtyń zańsyz áreketteriniń basqa epızodtary boıynsha tergeý jalǵasyp jatyr.

«Sonymen qatar agenttik zańsyz kiristerge satyp alynǵan sheteldik aktıvterdi anyqtaý jáne buǵattaý jumystaryn júrgizýde.

Sheteldik áriptesterden materıaldar kelip túskennen keıin tıisti quqyqtyq baǵa beriledi.

Aıta ketý kerek, 2010 jyldan beri Boranbaevpen enshiles kompanııalar Qazaqstanda óndirilgen gazdyń edáýir bóligin shetel shottarynda kiris shoǵyrlanýymen eksporttaǵan. Bul áreketter ulttyq múddege qaıshy jasaldy.

Tergeý jumystarynyń nátıjesinde, bıyldan bastap jyldyq quny 440 mln AQSh dollarynan asatyn (207 mlrd teńge) qazaqstandyq gazdyń kórsetilgen kólemi el ishindegi tutynýshylarǵa jáne memlekettiń eksporttyq áleýetin arttyrýǵa baǵyttaldy», - delingen Qarjy monıtorıngi agenttiginiń habarlamasynda.