14-35 jastaǵy azamattarǵa 3 mln teńge qaıtarymsyz grant beriledi
ASTANA. KAZINFORM – 14 jastan 35 jasqa deıingi jastar 3 mln teńge mólsherinde «Táýelsiz urpaqtar» grantyn ala alady. Konkýrsqa ótinimderdi qabyldaý 18 tamyzǵa deıin jalǵaspaq. Bul týraly QR Mádenıet jáne aqparat mınıstrligi Jastar jáne otbasy isteri komıtetiniń tóraǵasy «Daryn» Memlekettik jastar syılyǵy jáne «Táýelsizdik urpaqtary» granty máseleleri boıynsha ótken baspasóz konferentsııasynda habarlady.
- 2021 jyldan bastap, Memleket basshysynyń bastamasymen shyǵarmashyl jastardy qoldaý úshin jyl saıyn jastarǵa 3 mln teńge mólsherinde «Táýelsiz urpaqtar» granty beriledi. Grantqa 14-35 jas aralyǵyndaǵy QR azamaty úmitker bola alady. Qaǵıdalarǵa sáıkes konkýrs 2 kezeńde ótkiziledi. 1-kezeń – konkýrstyq ótinimderdi qabyldaý jáne qaraý. 2-kezeń – konkýrstyq ótinimderdi baǵalaý jáne konkýrstyq komıssııanyń jeńimpazdaryn anyqtaý. Bıyl grantqa úmitkerlerdiń konkýrstyq ótinimderin qabyldaý rásimi 16 maýsym – 18 tamyz aralyǵynda júrgiziledi, - deıdi Qaırat Qambarov.
Bıyl jalpy respýblıkalyq granttyń ıegerlerinen bólek taǵy 277 jas óńirlik konkýrstardy jeńip alý múmkindigine ıe bolmaq.
- Konkýrstyń qorytyndysy boıynsha aǵymdaǵy jyldyń sońyna deıin 30 azamatqa 3 mln teńge kóleminde «Táýelsiz urpaqtar» granty beriledi. 2025 jyly ákimdikterdiń aqparaty boıynsha jergilikti bıýdjetten 277 óńirlik grant berý josparlanyp otyr. Bul rette ákimdikter granttyń sany men mólsherin, sondaı-aq baǵytyn derbes bekitetinin atap ótken jón. Grantty paıdalaný merzimi 1 jyldan aspaıdy. Konkýrs týraly tolyq aqparatty Mádenıet jáne aqparat mınıstrliginiń resmı saıtynan, sondaı-aq áleýmettik jelilerdegi resmı akkaýnttardan bilýge bolady, - deıdi Jastar jáne otbasy isteri komıtetiniń tóraǵasy.
Mádenıet jáne aqparat mınıstrliginiń mamany «Táýelsizdik urpaqtary» grantyn 2029 jylǵa deıin berý josparlanǵanyn aıtty.
- Grant konkýrs negizinde 6 baǵyt boıynsha jobalardy iske asyrý úshin beriledi. Olar: ǵylym, mádenıet, aqparattyq tehnologııalar, bıznes, medıa jáne volonterlik baǵyttar. Grantty júzege asyrý kezeńderinde 123 jas azamat respýblıkalyq deńgeıde «Táýelsiz urpaqtar» grantynyń ıegeri atandy. Jalpy, QR Prezıdentiniń «Ádiletti Qazaqstan – bárimiz jáne árqaısymyz úshin, qazir jáne árdaıym» saılaýaldy baǵdarlamasyn iske asyrý jónindegi is-qımyl jospary aıasynda «Táýelsiz urpaqtar» grantyn 2029 jylǵa deıin berý josparlanǵan, - deıdi ol.
Aıta keteıik, buǵan deıin «Daryn» syılyǵynyń ıegerlerine 1 mln teńge syıaqy beriletinin jazǵan edik.